Іс-шараға Өзбекстан Республикасының Қазақстандағы Төтенше және өкілетті елшісі Саидикром Ниязходжаев, Парламент Мәжілісінің депутаты Сауытбек Абдрахманов, науаитанушы, философия ғылымдарының докторы Мұхамедәли Әли Ахмедов, Әлішер Науаи шығармаларын қазақ тіліне аударған Мемлекеттік сыйлықтың лауреаты, ақын Несіпбек Айтұлы, «Шығыс жұлдызы – Науаи» мәнерлеп оқу байқауының қатысушылары қатысты.
ҚХА Төрағасының орынбасары-Президент Әкімшілігі Қазақстан халқы Ассамблеясы хатшылығының меңгерушісі Жансейіт Түймебаев өз сөзінде Шығыстан шыққан бірегей тұлғаларды айтқанда Хафиз, Фирдоуси, Рудаки, Низами, Омар Хайям, Сағди, Жалаладдин Руми, Насир Хусрау, Жәмимен қатар Науаидың есімі де мақтанышпен еске алынатынына тоқталды. Сондай-ақ хакім Абай бірегей тұлғаның шығармашылық зертханасына терең үңілсе, Мұхтар Әуезов, Есмағамбет Ысмайылов, Рахманқұл Бердібаев сияқты үлкен ғалымдар мол мұрасының кең танылуына елеулі үлес қосқанын атап өтті.
Парламент Мәжілісінің депутаты Фахриддин Қаратаев болса Өзбекстан мен Қазақстан үшін Төле би, Әйтеке би бабаларымыздың, Жалаңтөс баһадүрдің, Абылай хандардың мұралары екі елге де ортақ екенін айтты. «Мысалы, рухани құндылықтары ортақ туысқан екі ел үшін де Абылай хан, Жүсіп Жалаңтөс ортақ тұлғалар. Осы бағытта тарихтың зерттелмеген тұстары әлі көп. Туыстық тамырды нығайту бізге парыз», деді депутат Ф.Қаратаев. Ақын Несіпбек Айтұлы Әлішер Науаидың ғазалдарын қазақ тіліне тәржімалап, жеке жинақ шығарғанын, ҚазҰУ-дің шығыстану факультетінде қызмет еткен жылдары профессор Өтеген Күмісбаев Науаи ғазалдары мен Абай шығармашылығының сабақтастығын зерттеп, бірнеше ғылыми еңбек жазғанын еске салды. Ал Алматыдағы ең әсем көшелердің біріне Науаидің есімі берілуі көршілес жатқан екі ел қарым-қатынасын жақындататын жайлардың көптігін көрсететінін жеткізді.
– Қазақстан мен Өзбекстанды бағзы замандардан бергі достық қатынастар байланыстырады. Біз – тарихымыз ортақ, тіліміз туыс, тату көршілік салтын ұстанған бауырлас елдерміз. Осы ерекшеліктерімізді негізге ала отырып, екі мемлекет басшылары 2018 жылы Өзбекстанның Қазақстандағы жылын және 2019 жылы Қазақстанның Өзбекстандағы жылын өткізу туралы шешім қабылдаған болатын.
Өткен жылы –Қазақстанның Өзбекстандағы жылы аясында Қазақстан халқы Ассамблеясы тарапынан 200-ден астам іс-шара өткізілгенін атап айтқым келеді. Олардың екі халықты бұрынғыдан бетер жақындата түскені, екі ел арасындағы мәдени-гуманитарлық қатынастарды дамытудың маңызды факторына айналғаны ақиқат, – деді Жансейіт Қансейітұлы.
Әлішер Науаи XIV ғасырдың ортасы мен XV ғасырдың басында өмір сүрген түркі халықтарына ортақ ұлы ақын, ойшыл, мемлекеттік қайраткер. Оның шығармалары ХV ғасырдың өзінде Мәуереннаһр мен Хорасанда ғана емес, Иран, Әзербайжан, Шығыс Түркістан, Үндістан, Мысыр, түркі елдеріне, кейіннен Еуропа мен Америка кітапханаларына тарады.
Кеш барысында Әлішер Науаидің өмірі туралы бейнеролик көрсетіліп, қонақтар «Аналар аманаты» қолөнер шеберлері орталығының көрмесін тамашалады. Сондай-ақ Достық үйінің акт залында шығармашылық ұжымдардың концерттік бағдарламасы ұйымдастырылды.