Әншінің әлемнің 30-дан астам елінен келген жанкүйерлері аты аңызға айналған «Рига-Арена» стадионында бас қосты.
Спорт сарайында ине шаншар орын жоқ. Залдағы атмосфера таңдай қақтырады, ондағы көрерменнің барлығы көтеріңкі көңіл-күйде. Мұны олардың бет-жүзінен анық байқауға болады.
Әртүрлі елдерден жиылған жанкүйерлердің тілектері бір арнада тоғысып, керемет күй кешуде. Олар бір үлкен отбасы сияқты, сүйікті әншілеріне шынайы ықыластарымен құрмет білдіруде.
Көпшіліктің қолында жалаулар желбірейді, Димашты қолдайтын ұрандар жазылған плакаттар бар. Олар маңдайында «DEARS» деген жазуы бар бас киімдер киіп, жүрек түріндегі үлкен ашықхаттар ұстап алған.
Сондай-ақ әлемге танымал қазақстандық әнші Димаш Құдайберген өз концертінде нәзік жандарды Халықаралық әйелдер күні мерекесімен құттықтады.
«Баршаңызды 8 наурыз мерекесімен құттықтаймын! Сіздерге барлық жақсылықты, яғни бақыт, махаббат, отбасының амандығын тілеймін. Армандарыңыз орындалып, балаларыңыз лайықты адам болып өссін. Ерлеріңіз үнемі жандарыңызда болсын», - деді ол.
Әншінің құттықтауы жазылған видеоны Instagram-дағы эстондық өнерсүйер қауым жариялаған.
Еске сала кетейік, 9 наурызда Димаш Құдайберген Мәскеуде, 11 наурызда – Киевте, 19 наурызда – Гамбургте, 21 наурызда – Дюссельдорфта, 25 наурызда – Прагада, 29 наурызда – Штутгартта, ал 4 сәуірде Минскте концерт береді деп күтілуде.
