Өзінің Латын Америкасы елдеріне сапары аясында Сыртқы істер министрі Ерлан Ыдырысов Сантьяго қаласына келіп, бірқатар екіжақты кездесулер өткізді, деп хабарлады осы ведомствоның баспасөз қызметі.
Өзінің Латын Америкасы елдеріне сапары аясында Сыртқы істер министрі Ерлан Ыдырысов Сантьяго қаласына келіп, бірқатар екіжақты кездесулер өткізді, деп хабарлады осы ведомствоның баспасөз қызметі.
Е.Ыдырысовтың Чилиге сапары Шетел инвестициялары жөніндегі комитет жетекшісі Матиас Моримен келіссөздерден басталды. Қазақстан сыртқы саясат ведомствосының басшысы М.Мориді Қазақстанның әлеуметтік-экономикалық саладағы және еліміздің инвестициялық саясатындағы қол жеткізген жетістіктерімен таныстырды. Қазақстан тәуелсіздік жылдары ішінде болжанбалы және сенімді іскер әріптеске айналғанын атай отырып, еліміздің бас дипломаты әңгімелесуші тарапты біздің Отанымызда өтетін ірі халықаралық шара – ЭКСПО-2017 көрмесіне орай Қазақстанға инвестициялар салу мүмкіндігін қарастыруға шақырды. Өз кезегінде М.Мори екіжақты ынтымақтастықты дамыту жөніндегі мүдделердің ортақтығына назар аударды және бар әлеуетті ортақтаса отырып зерделеуге дайын екендігін білдірді.
ҚР СІМ басшысының Чили Сыртқы істер министрінің міндетін атқарушы Альфонс Наварромен өткізген келіссөзі негізгі шараға айналды. Е.Ыдырысов Қазақстан Сыртқы істер министрінің Чилиге алғашқы сапары екі елдің дипломатиялық қарым-қатынастарының 20 жылдығына тұспа-тұс келгенінің нышандық мәні бар екенін атап өтті. Қазақстандық дипломат әріптесіне «Қазақстан-2050» ұзақ мерзімді Даму стратегиясы туралы баяндап, оның аясында Қазақстан әлемнің дамыған 30 елінің қатарына кіру жөнінде үлкен мақсат қойып отырғанын жеткізді. Осыған орай, Қазақстан өзінің халықаралық байланыстарын кеңейтуге мүдделі. Бұл ретте назарын Латын Америкасы мен Африка елдерімен ынтымақтастықты дамытуға аударатын болады.
А.Наварро өз елінің Қазақстанмен әріптестікті нығайтуға деген белсенді қызығушылығын жасырмады. «Өңірлеріңіздегі елдердің арасында Қазақстан біз үшін ерекше қызығушылық тудырады. Біз өзара байланыстарды кеңейтуге дайынбыз», – деді ол. Ол сауда, энергетика және тау-кен өнеркәсібі салаларында ынтымақтастықтың айтарлықтай әлеуеті бар екенін атап өтті.
Екі ел азаматтарының өзара сапарлар алмасу тәртібін жеңілдету мәселесі кездесудің басты тақырыбына айналды. Бұл бағыттағы маңызды қадам – келіссөздер барысында қол қойылған Дипломатиялық және қызметтік паспорттар иелерін визалық талаптардан босату туралы келісім болды. Тараптар екі елдің азаматтары үшін жақын болашақта толығымен визалық талаптарды жою бойынша келісімге жету мақсатында келіссөздерді жалғастыра беруге уағдаласты.
Сонымен қатар, Қазақстан мен Чили СІМ-дері арасында Саяси кеңестер туралы келісімге қол қойылды. Бұл құжат екі ел арасындағы үнқатысуды жүйелі жолға қоюға бағытталып отыр.
Сондай-ақ, А.Наварро қазақстандық тарапты Чилидің Астанада дипломатиялық өкілдік ашуды жоспарлап отырғаны туралы хабардар етті.
Қазақстан Сыртқы істер министрі Чилидің Энергетика министрі Хорхе Бунстермен және Тау-кен өндірісі министрі Эрнан де Солниакпен кездесіп, екі-жақты ынтымақтастықтың өзекті мәселелерін талқыға салды. Тараптар байланыстарды әрі қарай дамыту жолдарын қарастырып, ынтымақтастықтың болашағы бар бағыттарын айқындады.
Е.Ыдырысов Чили Дипломатиялық академиясының ректоры Пабло Кабреромен де кездесу өткізіп, академия тыңдаушылары алдында лекция оқыды.
Ресми кездесулерден бөлек, Қазақстан сыртқы саясат ведомствосының басшысы Чили Президенті Себастьян Пиньера Эченикемен бейресми кездесу өткізді. Келіссөз барысында С.Эченике Қазақстан Президентіне өз еліне сапармен келуге шақыруын табыс етті. Е.Ыдырысов, өз кезегінде, Чили басшысын оған ыңғайлы уақытта Қазақстанға сапармен келуге шақырды.
Е.Ыдырысовтың Чилиге сапары Латын Америкасының жетекші елдерінің бірімен екіжақты қарым-қатынастың жаңа бетін ашып, Қазақстан сыртқы саясатының белсенді әрекетке көшуі жөніндегі талпынысын көрсетті.
Латын Америкасындағы турне аясында Е.Ыдырысов Аргентина мен Бразилияға да сапармен барады деп күтілуде.