Ақтөбе облысының Ресейдің шекаралас өңірлерімен экономикалық байланысын нығайтуға бағытталған қадамдары қуатты бола түсуде. Бұған «Еуропа-Азия» шекарасыз ынтымақтастық» ХII халықаралық өнеркәсіп көрмесі анағұрлым серпін беріп келеді. Биыл бұл көрме «AKTOBE INVEST-2013» бірінші халықаралық инвестициялық форумы аясында өткізілуде. Көрменің мақсаты Қазақстанға инвесторлар тарту, екі ел арасындағы сауда-саттықты дамыту, сондай-ақ, алыс-жақын шетелдермен экономикалық ынтымақтастықтың көкжиегін кеңейтудің қайтарымды жолдарын іздестіру болып табылады.
Ақтөбе облысының Ресейдің шекаралас өңірлерімен экономикалық байланысын нығайтуға бағытталған қадамдары қуатты бола түсуде. Бұған «Еуропа-Азия» шекарасыз ынтымақтастық» ХII халықаралық өнеркәсіп көрмесі анағұрлым серпін беріп келеді. Биыл бұл көрме «AKTOBE INVEST-2013» бірінші халықаралық инвестициялық форумы аясында өткізілуде. Көрменің мақсаты Қазақстанға инвесторлар тарту, екі ел арасындағы сауда-саттықты дамыту, сондай-ақ, алыс-жақын шетелдермен экономикалық ынтымақтастықтың көкжиегін кеңейтудің қайтарымды жолдарын іздестіру болып табылады.
Көрменің және форумның аясында біртұтас экономикалық кеңістік құру бағытында тауарлар, қызметтер, капитал және жұмыс күшінің ойдағыдай қамтамасыз етілуінің өзекті мәселелері сөз болады. Онда ғылым мен бизнестің проблемалары да әңгіме өзегіне айналады. Көрмеге қатысушылар тауарлардың, қызметтердің жаңа түрлерімен танысады, іскерлік және сауда байланыстарының нығаюына берік негіз қаланады.
Бұрындары бұл көрмеге 150-ге жуық Ресей және Қазақстан кәсіпорындары қатысатын болса, биыл бірінші рет 20-дан астам Польшаның өндіріс орындары келіп отыр. Бұл жолы Польша жер қазу, жол-құрылыс және тау-кен техникаларын, химия өнеркәсібі өнімдерін әкелген. Олар сондай-ақ, әйелдер киімін, шұлық бұйымдарын да көрмеге ұсынды. Ресей елі құрылыс машиналарын, энергия және қуат үнемдегіш, мұнай-газ техникаларын, құрал-жабдықтар, қондырғылар, автомобиль мен қосалқы бөлшектер, жеңіл тамақ өнеркәсібі өнімдерін әкелген. Биыл көрмеге Орынбор облысындағы «Желен» ет комбинаты, «Урал бройлері» ЖАҚ сапалы ет өнімдерін көптеп қойды.
Осы көрмеге Ресейдің тек Орынбор облысынан ғана емес, Уфа, Самара, Екатеринбург, Обнинск, Златоуст және басқа қалаларынан да кәсіпорындар келді. Ақтөбе облысындағы сантехникалық бұйымдар шығаратын «Тенуса» ЖШС, өнеркәсіптік жарылғыш заттар өндіретін «НитрохимГрупп» ЖШС, Саран қаласындағы жасанды жамылғы шығаратын «Карат» ЖШС және басқа кәсіпорындар өнімдеріне ресейліктер тарапынан да қызығушылық болды. Ал, Қызылорда облысының Қазалы ауданынан келген «Сыр маржаны» ЖШС өз өнімдерін Ресейге өткізуге Ақтөбедегі көрменің септігі тиетініне сенімді. Серіктестік биыл 1800 гектарға күріш өсіріп, әр гектардан 42 центнер өнім жинапты. Енді осы көрме аясындағы шаралар барысында өздеріне тұрақты тұтынушы табу ниетінде екендіктерін аңғартты.
Көрменің салтанатты ашылуында облыс әкімінің бірінші орынбасары Нұрмұхамбет Әбдібеков сөз сөйлеп, «Еуропа-Азия» шекарасыз ынтымақтастық» ХІІ халықаралық өнеркәсіп көрмесін экономикалық ынтымақтастықты нығайтудағы ұтымды қадам ретінде бағалады. Өңірдің соңғы жылдары серпінді дамып келе жатқанын тілге тиек ете келіп, көршілермен экономикалық байланыстарды нығайтудағы жаңа бастамаларға тоқталып өтті. Орынбор облысы үкіметі төрағасының орынбасары, облыстық ауыл шаруашылығы министрі Михаил Маслов өткен жылы Ақтөбе облысымен екі арадағы сауда-саттық 230 миллион АҚШ долларын құрағанын, әсіресе, қой және ірі қара етіне сұраныс жоғары екенін жеткізді. Мұндай екіжақты ынтымақтастықтың тиімділігін атап өтті.
Сатыбалды СӘУІРБАЙ,
«Егемен Қазақстан».
Ақтөбе облысы.