Қазақстан Республикасының Берлиндегі елшілігінде Германияның салалық министрліктері басшылығының, іскер топтары мен баспасөз өкілдерінің қатысуымен «Астана 2017 жылы Дүниежүзілік мұнай конгресінің өткізілу орны ретінде» тақырыбында конференция өтті, деп хабарлады ҚР СІМ-інің баспасөз қызметі.
Қазақстан Республикасының Берлиндегі елшілігінде Германияның салалық министрліктері басшылығының, іскер топтары мен баспасөз өкілдерінің қатысуымен «Астана 2017 жылы Дүниежүзілік мұнай конгресінің өткізілу орны ретінде» тақырыбында конференция өтті, деп хабарлады ҚР СІМ-інің баспасөз қызметі.
Форумның ашылуында Қазақстанның Германиядағы елшісі Нұрлан Онжанов пен «KAZENERGY» қауымдастығы төрағасының орынбасары Жамболат Сәрсенов сөз сөйледі. Қазақстандық дипломат қатысушыларды «Қазақстан-2050» Даму стратегиясы аясындағы Қазақстанның саяси және әлеуметтік-экономикалық дамуының негізгі қырлары мен қазақ-герман ынтымақтастығының өзекті бағыттарынан хабардар етіп, 2017 жылы Астана қаласында Дүниежүзілік мұнай конгресін өткізуге деген Қазақстанның өтінімін қолдауға шақырды.
«KAZENERGY» қауымдастығы төрағасының орынбасары Жамболат Сәрсенов Қазақстанның кандидатурасын халықаралық аренада ілгерілету бойынша жан-жақты түсінік берілген баяндама жасады. Ол еліміздің мұнайды шығару, ұқсату мен тасымалдау бойынша әлеуеті және ірі халықаралық іс-шаралар өткізу саласында жинақтаған тәжірибесі туралы кеңінен әңгімеледі.
Неміс тарапынан ГФР Экономика және технологиялар министрлігі энергетикалық саясат департаментінің басшысы Йорг Кирш, Германиядағы Сыртқы саясат қоғамы Бертольд Байц атындағы орталығының директоры Эвальд Бёльке және KSA Deutag Drilling GmbH компаниясының басшысы Юрген Вернинг сөз сөйледі.
Германия жағынан қатысушылар Еуропаның энергетикалық қауіпсіздігін қамтамасыз етуде Қазақстанның рөлі мен маңызына жоғары баға беріп, Астана мұнай форумын қабылдауға дайын екенін атап өтті. Шараға қатысушылар форумның нәтижесі бойынша егжей-тегжейлі пікір алмасты.
Энергия ресурстарының мол қорына ие бола отырып, Қазақстан өзінің кандидатурасын мұнай-газ нарығындағы басты форумды өткізуге ілгерілетуде. Аталған конгрестің шеңберінде мыңдаған маман өз тәжірибелерімен бөлісіп, басқару және мұнай шығару технологиялары бойынша пікір алысады.