«Қожа Ахмет Ясауи кесенесінің алдында тұрған қазақтың хандары мен билерін, игі жақсыларын суреттеп шықтым. Адам бейнесін жасау – ауыр әрі үлкен жауапкершілік. Менің арманым – суретші болу. Сондықтан өз туған жерімдегі барша қазақтың тұлғалары елімізге ақ баталарын беріп тұрған сәтін сезінгім келді. Күні-түні осы көріністі армандап, суреттеп шықтым», дейді туған жерге деген ыстық ықыласын өз өнерімен білдірген жас суретшінің бірі Есіркеп Сәбитұлы.
Сонымен қатар Түркістан қаласының жас дарындары сурет салудан шеберлік сабақтарын жүргізіп, еліміздің түкпір-түкпіріндегі достарына онлайн түрде таныстырып шықты. Халықаралық балаларды қорғау күні демалыс алаңшасында отбасымен серуендеген жергілікті тұрғындар мен қала қонақтары көрмеге қойылған 50-ге жуық туындымен танысып, алғыстарын білдірді. «Әзірет Сұлтан» мемлекеттік тарихи-мәдени қорық-музейі балалардың қызығушылығын арттыра отырып танымын кеңейту, шығармашылық қабілеттерін дамыту бағытында суретшілер сайысы, балалар көрмесі, балабақша және мектеп оқушыларына арналған экскурсиялар ұйымдастыруды дәстүрге айналдырған. Биыл еліміздегі пандемияға орай жарияланған сақтық шараларына сәйкес көптеген іс-шара онлайн өткізілді.
Түркістан облысы
