Қаржы • 12 Маусым, 2020

Қай өңір көп еңбекақы алады?

1674 рет көрсетілді

Биылғы алғашқы тоқсанда білім беру қызметкерлерінің орташа еңбекақысы 154,6 мың теңгені құрады. Салада жұмыс істей­тін­дер­дің төрттен үші – нәзік жандар. Ranking.kz осылай деп хабарлады.

2019 жылғы алғашқы тоқсан­мен салыстырсақ, биыл пе­да­гог­­тердің еңбекақысы 40,6 па­­йызға жоғарылапты. Содан бер­гі аралықтағы инфляция­ны есеп­тей­тін болсақ, табысы 32,6 пайызға кө­бейді деуге болады. Та­быспен қа­тар, сала қыз­мет­кер­ле­рінің сатып алу қабілеті де жоға­ры­­лады.

– Республика бойынша орташа жа­лақы бір жылда 18,9 пайызға өсіп, 200,3 мың теңгеге жетті. Білім беру саласы қызметкерлерінің сатып алу қабілеті 12,2 пайызға артты, – дейді  Ranking.kz.

Білім беру саласындағы ең төменгі еңбекақы мектепке дейінгі білім беру ошақтарында екені анықталып отыр. Қазір олардың орташа жалақысы – 90,3 мың теңге. Инфляцияны есепке алған­да, мектепке дейінгі мекемелерде істейтіндердің табысы 21,5 па­йыз­ға өсті.

Орта білім беру сегментіндегі педагогтердің орташа табысы – 171,3 мың теңге, шынайы өсім – 40,2 пайыз. Саладағы ең жоғарғы еңбекақы жоғары білім беру меке­ме­леріндегі мамандарға тие­сі­лі – 190,9 мың теңге.

Биылдан бастап педагогтерді аттестациялау жүйесі жетілдіріліп, біліктілік санатын көтеру балына қа­тысты талап күшейгенін айта кету керек. Сонымен қатар білім беру мекемелерінің басшыларына арналған аттестациялау тәртібі енгізілді. Аттестацияда көр­сет­кен нәтижесі бойынша басшы қыз­мет­кер­дің біліктілік санаты жоға­ры­лап, қызметтік еңбекақысы 30-100 па­йызға өседі.

Аймақтар бойынша еңбекақы көлеміне келер болсақ, ең жоғарғы айлық елордалық білім беру сала­сы­ның мамандарына тиесілі. Был­тырғымен салыстырғанда жала­қысы 32,5 пайызға көбейген ел­ор­далық педагогтер қазір орташа есеппен айына 260,3 мың теңге алады. Нұр-Сұлтан қаласындағы көр­сеткіш республика бойынша орташа көрсеткіштен 1,7 есе жо­ға­ры екенін айта кету керек.

Екінші орынды Алматы қаласы иеленсе (181,3 мың теңге, 27,5 па­йыз жоғарылады), үшінші орынға Алматы облысының педагогтері жайғасты (158,5 мың теңге, 49,5 пайыз жоғарылады).

Қазақстан бойынша ең төменгі еңбекақыны Батыс Қазақстан облысының білім беру мамандары алатыны анықталып отыр. Аймақтағы педагогтердің орташа жалақысы – 134,6 мың теңге.

Жалпы, ел бойынша білім беру саласында 1,1 млн адам еңбек етеді. Олардың 26,2 пайызы – ер-азаматтар. Саладағы ең көп мамандар Түркістан облысында – 139,1 мың адам. Бір жыл ішінде облыста педагогтердің саны 5,8 пайызға көбейіпті. Одан кейінгі орындарда Алматы облысы (129,1 адам) мен Алматы қаласы (96,9) тұр.

 

Соңғы жаңалықтар

Қай салада жалақы өсті?

Экономика • Бүгін, 11:45

Ұқсас жаңалықтар