Шығыстың әйгілі жеті шайырының бірі Фирдоуси жырлаған, әлем әдебиетінің үздік туындысы саналатын бұл кітап Мұхамедия Бәйменовтің жеке кітапханасында сақталып келген. Ал 2018 жылдың мамыр айында Жезқазған тарихи-археологиялық музейінің 40 жылдық мерейтойына байланысты өткізілген іс-шарада Мұхамедия ақсақалдың ұлы Әлихан Бәйменов «Шахнама» кітабын музей қорына тарту етіпті.
Өткен ғасырдың басында Қарнақ, Шорнақ, Ақтас медреселерінде оқып, діни білім алған Мұхамедия Бәйменовтің өміртарихы тұнған тағылым. Кеңес заманының өзінде ол кісі Жезқазғанда мешіт ашу мәселесін батыл түрде көтеріп, партияның Орталық Комитетіне бір жарым жылдың ішінде 15 рет хат жазған екен. Алған бетінен қайтпаған қайсар жан табандылығының арқасында мақсатына қол жеткізген: Мұхамедия Бәйменов мысты шаһарда тұңғыш мешітті салдырып, оның алғашқы имамы болады.
«Хижра бойынша шамамен 1329 жылы жарыққа шыққан бұл «Шахнама» кітабының парсы, шағатай және түрік тілдерінде жазылғанын анықтап, оқығандар – Жезқазған қаласының бұрынғы бас имамы Мәди Смағұлов пен Алматы мешітінің қызметкері Әбдіқапар қари» деген дерек келтіреді аталған музейдің басшысы Раушан Қапарова.
Қарағанды облысы,
Жезқазған қаласы