Саясат • 16 Қыркүйек, 2021

Әлеуметтік қолдау – әрдайым назарда

223 рет
көрсетілді
2 мин
оқу үшін

Премьер-Министрдің бірінші орынбасары Әлихан Смайыловтың төрағалығымен Nur Otan партиясының сайлауалды бағдарламасын іске асыру жөніндегі штаб отырысы өтті, деп хабарлады Үкімет басшысының баспасөз қызметі.

Әлеуметтік қолдау –  әрдайым назарда

Штаб отырысында студенттерге жатақханадан орын беру, халықтың әлжуаз топтарына әлеуметтік көмек көрсету, мүмкіндігі шектеулі жандарға арналған инфрақұрылымды жақсарту мәселелері қаралды.

Талқылауға түскен мәселелердің бірі 2025 жылға қарай колледждер мен университеттер жатақханаларынан кемінде 50 мың жаңа орынды пайдалануға беру болды. Биылғы 1 қыркүйектегі жағдай бойынша 1924 орынға арналған 10 жатақхана пайдалануға берілді. Осы жылдың аяғына дейін 12 185 орындық қосымша 37 жатақхананы пайдалануға беру жоспарланып отыр.

Кездесу қорытындысы бойынша қысқа мерзімде мүдделі мемлекеттік органдарға мемлекеттік тапсырыс­ты орналастыру механизмін жетілдіруге байланысты ұсыныстарды қарау туралы бұйрық берілді. Сондай-ақ жалғыз басты қарт азаматтарға қосымша әлеуметтік қолдау түрлері жөнінде айтылды. Атап айтсақ, қиын жағдайға тап болған жалғызілікті жандарға біржолғы материалдық көмек көрсету, дәрі-дәрмекпен қамтамасыз ету, санаторий-курорттық емделу, тұрғын үйін жөндеуге қол ұшын беру сынды мәселелер көтерілді. Ерекше қажеттіліктері бар адамдар үшін пандустар орнату, арнайы лифттер, дәретханалар салу және зағип жандарға арналған бағыттауыш белгілер орнату жайы да қозғалды.

Бүгінде қоғамдық бақылаудың аймақтық топтарының мониторинг объектілері бойынша жұмысы жандандырылып жатыр. Жиында мүгедектерді жұмысқа орналастыру бойынша жүргізіліп жатқан жұмыстар легі де талқыланды. Бірінші жартыжылдықтың қорытындысы бойынша жұмыспен қамтылған мүгедектер үлесі жұмыспен қамту орталықтарына жүгінген еңбекке жарамды мүгедектердің 29,7%-ын құрайды.

Премьер-Министрдің бірінші орынбасары мүгедектерді жұмыспен қамту мәселелері бойынша қолдау шаралары кешенін қарастыруды (оқыту, жұмыс орындарын қайта жабдықтау, жалақының бір бөлігін субсидиялау, жұмыспен қамту квотасының сақталуын бақылау) қамтамасыз етуді және жұмыспен қамту мәселесіне ерекше назар аударуды тапсырды. Бұл шаралар 2025 жылға дейін әзірленген Ұлттық жұмыспен қамту жобасында көрініс табуы тиіс.