Жазғы демалысқа дайындық

Республикалық қосымша білім беру оқу-әдістемелік орталығы жуырда Ақмола облысының Щучье қаласындағы «Балдәурен» республикалық санаторийінде педагогикалық жасақтар мен балалардың жазғы демалысын ұйымдастырушылардың республикалық слетін өткізді. Ондағы мақсат, колледждер мен жоғары оқу орындарының үздік педагогикалық жасақтарын және балалардың жазғы демалысын ұйымдастырушыларды оқыту және олардың ортасында тәжірибе алмасу алаңдарын құру болатын. Слетке педагогикалық олим­­­п­иаданың бірінші айналы­мының жеңімпаздары мен колледждердің, ЖОО-ның үздік педагогикалық жасақтары, жалпы орта және қосымша білім беру ұйымдарының педагогтары қатысты. Шараның бағдарламасы слет­­­­тің салтанатты ашылуын, пе­дагогикалық жасақтардың тұсау­кесерлерін, шығармашылық шеберханаларды, шеберлік сыныптарын, байқаулар мен дөңгелек үстелдерді, тәжірибелік сабақтарды қамтыды. Слеттің аясында білім беру ұйым­дарының қызметтерін кеңі­­нен ашып көрсететін, оған қоса жазғы кезеңде балалар­ды сауық­тыру жөніндегі қызықты тәжі­рибе, әдістемелік нұсқаулар, фото­сурет материалдарынан құрал­ған «Тәлімгерлік жаз» атты рес­пуб­ликалық көрме ұйым­дастырылды. Республикалық слетке қаты­сушылар «Біз топ да­рын­дыларымыз», «Лагерьдің өмірі­нен бір күн», «Педагогикалық жағ­­дайларды шешу», «Залмен ойын ойнау», «Тәлімгерлік жаз» ат­ты түрлі байқаулар аясында бақ сы­насты. Нәтижесінде Бас жүлдемен М.Жұмабаев атындағы Петропавл гуманитарлық колледжінің «Жі­гер» педагогикалық жасағы (же­текшісі Дамира Қадырбекова), І дәрежелі дипломмен Көкше­тау­дағы Ж.Мусин атындағы пед­а­­­­гогикалық колледжінің «Шуақ» педагогикалық жасағы (жетекшісі Анаргүл Айтен), ІІ дәрежелі дипломмен Алматы облысының «Жүрек жылуы» педагогикалық жасағы (жетекшісі Айгүл Қуанышбаева), «Есік гуманитарлық-эко­но­мика­лық колледжі» марапатталса, ІІІ дәрежелі дипломға Ж.Дос­­­­­­­мұ­ха­медов атындағы педа­гогикалық кол­леджінің «Жа­йық жастары» педагогикалық жасағы (жетекшісі Гүлнар Нұра­шева) лайық деп табылды. Же­ңімпаз жасақтарға ба­ғалы сыйлықтар үлестірілді. Салтанат САЛБЕНБЕКОВА, Республикалық қосымша білім беру оқу-әдістемелік орталығының бөлім әдіскері. АСТАНА.