Кәсіп иелері қамқорлықты сезінуде

Елбасы Нұрсұлтан Назарбаевтың шағын және орта кәсіпкерлікті негізсіз тексеруге жариялаған мораториі күшіне енді. Алматылық кәсіпкерлер бұл шешімнің бизнестің үлкен жолына бағыт сілтер тура жол екендігіне дән риза. Өз ісін өрге бастырып, бірнеше отбасын жұмыспен қамтамасыз етіп отырған «Заман» жеке кәсіпкерлік қауымдастығының басшысы Кенжебек САУЫТҰЛЫН сөзге тарттық. – Елбасы Нұрсұлтан Назарбаевтың шағын және орта кәсіп иелеріне негізсіз тексеріс жасауды болдырмау мақсатында мораторий жариялауы еліміздегі шағын кәсіп иелерінің тынысын ашқандай болды. Бір істі қолға алып, шаруаны енді бастаған жас кәсіпкерге тексеру жүргізу шынында да көп­­теген қиындықтар алып келетіні анық. Өзіміз де алғаш іс бастағанда негізсіз тек­серістер, ретсіз айып тағу секілді мәселелерге тап бол­ғанбыз. Мұндайда кәсібіңді жүргізесің бе, салық, несие, отырған ғимаратыңды жалға алу немесе тексерушілердің талабына уақыт кетіресің бе дегендей, біршама тығырыққа тірелген де кездер болды. Біз қазір азық-түлік жет­­­­кізу және асханалық қызмет көрсету ісімен айналысып отырмыз. Мейлінше, ауыл­­­­ша­руашылық өнім­дерін, ет, сүт секілді көп тұтынылатын тауарларды арадағы делдалсыз халыққа жеткізу жолына көп көңіл бөлеміз. Соның өзінде біз­дің түрлі шығындарымыз бен нарықта кездесетін қиын­­­шылықтарымыз бар. Міне, мораторий жариялау арқылы кәсіпкерлердің етек-жеңін жиюына, өз шаруасының дұрыс жолға түсуіне көптеген еркіндіктер жасалады. Мәселен, мемлекеттік бағдарлама арқылы тендерге түсіп, белгілі бір құ­ры­лыс нысанын тұрғызу құ­қы­ғына ие болсаңыз, артын­ша тексерістердің нысана­сына айналып шыға ке­лесіз. «Мына кірпіштің көле­мі стандартқа сай емес, неге қа­бырғаның балшығы біркелкі жағылмаған?!» деген секілді ескертулер мен айыптауларды да естіген едік. Мұндай тексерістердің артында тек қана кәсіп иесіне қадала отырып, әйтеуір, бір тиын-тебенін болса да қақшып алу әрекеті көп байқалатын. Оның сыртында, жергілікті әкім ауысып, алдыңғы тендер иесін ығыстыру айлалары да әр-әр жерден бой көрсеткені де рас. Мен қазір жеке кәсіп иесі ретінде сонау Семей жерін­дегі өзіміздің жетісу­­­лық кәсіп­­керлермен күнде байланы­сып отырмын. Солардың бәрі мораторий жарияланып, Елбасының ел азаматта­ры­на, өз ісін жетілдірем деген кісілерге жасап отырған мүм­кіндігіне шын жүректен разы болып отыр. Бұл – біздегі тең құқылы қоғамның даму жо­лындағы игі қадамын көрсетеді. Мораторий тек кәсіп­­кер­лерді бей-берекет тексеруден құтқару ғана емес, кәсіпті енді бастаған жас іскерлерді даңғыл жолға салу деп түсіну керек. Және де бұл жолғы мораторийде «айналысып отырған кәсібі күмәнді емес шағын және орта бизнес өкілдері» деп тайға таңба басқандай анық көрсетілген. Яғни тексеріс жоқ екен деп ешкім де ойына келгенін істеп, заң бұзушылыққа баруға қақысы жоқ. Ең бастысы, кәсіпкерлікті енді ғана игере бастаған отандастарымызға тағы да үл­кен қолдау жасалып отыр. Құ­жат мәселесі, бас­қа да көптеген шаруаларды ор­нықты атқаруға және қолға алған кәсіпті дөңгелетіп әке­туге бұл үлкен демеу. Сы­байлас жемқорлық дамы­­ған барлық қоғамда болатын дерт. Соны жою үшін осындай мораторийлер мен басқа да түрлі талаптар аясында жұмыстар атқарылса, әрине, ондай игі қадамды халық құп көреді. Елбасының ұстанған саясаты мен бүгінгі біздің алған бағытымыз өсуге, өркендеуге негізделген. Шағын кәсіп ие­ле­рі өз құқықтарының заң­­мен қорғалғанына, заң ая­сын­­да адал еңбек, маңдай тер­­дің же­­­місін жей алатынына бек се­нім­ді. Жазып алған Қанат ЕСКЕНДІР, «Егемен Қазақстан». АЛМАТЫ.