Рустам Шукуров пен Муззама Мансурованың бас қосып, шаңырақ көтергеніне 30 жылдан асыпты. Екеуі де үйелмелі-сүйелмелі бала-шағасы бар үлкен отбасында өскен. Бүгінде туған ұлдары Юлдаш пен Шерзод ержетіп, жеке отау құрып, үлкен азамат болды. Екі ағасына еркелеп өскен Шакирасы да бойжетіп қалды, биыл 16-ға толды.
– Қызым Шакира кішкентай кезінде менімен ойнайтын ешкім жоқ, ішім пысты дегенді жиі айтатын. Өзім алты құрсақ көтердім, үш нәрестем шетінеп кетті. Қызымның әлгі сөздері көпке дейін көңілден кетпей тұрып алды. Ақыры отағасы екеуміз ақылдаса келе, балалар үйінен бала асырап алуды ұйғардық. Әу баста бір-екі бала асырап алып, сонымен шектелгіміз келген. Бірақ балалар үйіне келіп, кішкентай бөбектерді көріп, тілдесіп көрген соң, жеті баланы бірдей асырап алдық. Кейін оларға тағы қосылды. Аллаға шүкіршілік, балаларымның барлығына тәуба деймін. Ешқашан жаным қиналып, ренжіген емеспін, – дейді Муззама.
Көпбалалы отбасы бұған дейін шағын дүкен ұстапты. Одан кейін көтерме бағамен жеміс-жидек сатуға көшті. Жеміс-жидектердің көбі – Шукуровтар отбасының өз бақшасында өскен табиғи өнімдер. Сондықтан бұл үйдің тоңазытқышы да үнемі түрлі жеміс-жидекке толып тұрады. Балалардың жегені алдында, жемегені артында.
– Балаларымның бәрін өз баламдай көрем. Ешқайсысының қолын қақпай, қанаттыға қақтырмай, тұмсықтыға шоқытпай мәпелеп бағып-қағып отырмыз. Шынымды айтсам, біздің тағы бала асырап алғымыз келеді. Бір ғана мысал, жақында Солтүстік Қазақстан облысы Саумалкөл балалар үйінен сегіз баланы асырап алғымыз келді. Арнайы барып, өз ниетімізді білдірдік. Одан кейін де жиі барып тұрдық. Жеме-жемге келгенде, балалар үйінің басшылығы мен үй қамқоршылары кедергі келтірді. Міне, екі жыл өтті. Сол балалар әлі балалар үйінде тұрып жатыр, – дейді Рустам Шукуров.
Көпбалалы отбасы күніне 30 бөлке нан сатып алады екен. Ерлі-зайыптылардың айтуынша, балалардың күнделікті ас-ауқатын әзірлеу қиын емес. Муззама қыздарын ас әзірлеуге араластырмай, тамақты өзі дайындайды екен. Үлкен болғандықтан, бұл үйдегі тамақ та арнайы құрылғылардың көмегімен піседі. Сондықтан көпбалалы ана қыздарым ас әзірлеп жүріп бірдемеге арандап қалар деп қорқады.
Бүгінде бұл үйдің үлкені Катя таяуда 18 жасқа толды. Үш жасынан бастап балалар үйінде тәрбиеленген бойжеткеннің өз отбасын тапқанына бір жыл болыпты. Қазір студент. Жоғары оқу орындарының бірінде өнер факультетінде білім алып жатқан Катя болашақта театр әртісі болғысы келеді.
– Мұндағы жағдайымыз балалар үйімен салыстырғанда, әлдеқайда жақсы. Ата-анамыз – өте мейірімді жандар. Қысқы демалысқа келдім. Бауырларымды сағынып қалыппын. Шағын сыйлықтар тарту етіп, бәрін қуантып қойдым, – дейді Катя.
Қазір Рустам мен Музамма тәрбиелеген 8 бала әр қаладағы жоғары оқу орындарында оқиды. Үйдің кенжесі Әзиза – 6 жаста. Келесі жылы бірінші сыныпқа барады.
Статистика мәліметіне сенсек, елімізде ұзын саны 107 балалар үйі бар екен. Бұл мекемелерде 4 606 бала тәрбиеленіп жатыр. Кейінгі бес жыл ішінде 795 отбасы 1 153 бала асырап алған.
Қостанай облысы
