مۇراتبەك وسپانوۆ: « ابايدى» قاجەت ەتپەيتىن ادامدار دا از ەمەس

3a4231103fa5559fa1a4f8af7a517278«اباي» رەسپۋبليكالىق جۋرنالىنىڭ قايتا جارىق كورگەنىنە 25 جىل تولۋىنا وراي جۋرنالدىڭ باس رەداكتورى، قازاقستان جازۋشىلار وداعىنىڭ مۇشەسى مۇراتبەك قابيدەن ۇلى وسپانوۆپەن وتكىزىلگەن سۇحبات.

– ءبىر عاسىرلىق عۇمىرى بار «اباي» جۋرنالىنىڭ تاريحى تۋرالى ايتىپ وتسەڭىز…

– ۇلى مۇحتار اۋەزوۆ پەن جۇسىپبەك ايماۋىتوۆ سەمەي قالاسىندا «اباي» جۋرنالىن شىعارعان. 1918-جىلى شىققان جۋرنالدىڭ ەڭ العاشقى سانىندا جۇسىپبەك ايماۋىتوۆ «جۋرنال تۋرالى» دەگەن العىسوزىندە بۇل جۋرنالدى نەگە، نە ماقساتپەن شىعارىپ وتىرعانىنا ەگجەي-تەگجەيلى توقتالادى. وعان قوسا:

«ءومىر جولى تار سوقپاق، يىلگەن جاق،

ءيىلتىپ ەكى باسىن ۇستاعان حاق.

يمەك جولدا تياناق، تەگىستىك جوق،

قۇلاپ كەتپە، تۋرا شىق، كوزىڭە باق»-دەپ ابايدىڭ وزىنەن ەپيگراف بەرەدى. «ادامنىڭ ادامشىلىعى ءىستى باستاعانىنان بىلىنەدى، قالاي بىتىرگەنىنەن ەمەس»، -دەپ ابايدىڭ ءوزى ايتپاقشى، بۇل كىسىلەر جۋرنال عۇمىرىنىڭ قىسقا بولارىن وزدەرى سەزگەن سياقتى. «تالابىم-تاياعىم، جىگەرىم-ازىعىم، ماڭدايىما ۇستاعان اقىن اباي-قازىعىم» دەگەن ۇمىتپەن شىعارىپ وتىرمىز دەيدى. بۇل جۋرنالدا الاش ارىستارىنىڭ دا ماقالالارى جارىق كوردى. 1918-جىلعى جۋرنالدىڭ ون ەكى سانىنا دا مۇحاڭ ءوزى ماقالا جازعان. ءمىرجاقىپ دۋلاتوۆتىڭ «ماديار» دەگەن بۇركەنشىك اتپەن جازعان «الاشقا» دەگەن اشىق حاتى دا بار. ول حاتتا وڭتۇستىك گۋبەرنيالارداعى قازاقتاردىڭ اشتىقتان قىرىلىپ جاتقانى تۋرالى ايتا وتىرىپ: «ءبىر ادامنىڭ قۇنى ءبىر شەلەك بيدايدىڭ قۇنىنا ءتۇسىپ كەتتى»، -دەيدى. بۇل سوزدەردى ول سەمەيدىڭ زيالىلارىنا قاراتا ايتادى. «وسىنداعى بايلاردىڭ قاتىندارى قۇلاقتارىڭداعى سىرعا، قولدارىڭداعى جۇزىكتەرىڭدى شەشىپ، ورتاعا جيناڭدار دا، قىرىلىپ جاتقان قازاق حالقىنا كومەكتەسىڭدەر»، -دەپ ۇلكەن تولعانىسپەن جازعان اشىق حاتى بار. وسىنداي ماقالالاردىڭ ءبارى شىعىپ، كەڭەس وداعى ورناعاننان كەيىن وسىنداي ءسوز ايتقان جۋرنالدى قىزىلدار جاقتىرا قويادى دەيسىز بە؟ بۇل تازا ۇلتتىڭ قامىن جەگەن جۋرنال بولدى. جۋرنالدىڭ ۇستاعان باعىت-باعدارىنىڭ ءبىرىنشىسى اباي بولسا، ەكىنشىسى حالىقتىڭ تاعدىرى مەن تاريحى. ماقالالاردىڭ بارلىعى نەگىزىنەن عىلىمي تۇرعىدا جازىلعان. جۋرنال جابىلدى، جابىلعان سوڭ ول تۋرالى ايتىلعان دا جوق، جازىلعان دا جوق. مەن ءوزىم جۋرناليستيكا فاكۋلتەتىندە وقىعانىمدا باسپا ءسوز تاريحىنان «اباي» جۋرنالى دەگەن شىققان دەپ ءبىر-ەكى ابزاتسپەن عانا شەكتەلدى. سەمەيلىك عالىم اعامىز اراپ ەسپەنبەتوۆ «حح عاسىرداعى قازاق ادەبيەتى جانە اباي جۋرنالى» اتتى ماقالاسىندا وسى جۋرنالدىڭ تاريحىنا عىلىمي تۇرعىدا توقتالادى.

– ءسىزدىڭ ەڭبەك جولىڭىز «اباي» جۋرنالىمەن قالاي توعىستى؟

– ونىڭ بىردەن-ءبىر سەبەبى، مەن ءوزىم اباي اۋدانىنىڭ ازاماتىمىن، سول جەردە تۋىپ-وسكەنمىن، مەكتەپتى دە سوندا ءبىتىردىم. سول ەلدەگى اۋداندىق گازەتتە ءوز ەڭبەك جولىمدى باستادىم. جۋرناليستيكا فاكۋلتەتىن بىتىرگەننەن كەيىن وبلىستىق «سەمەي تاڭى» گازەتىنە جولدامامەن كەلگەن جۋرناليستەردىڭ ءبىرىمىن. كەيىننەن «لەنينشىل جاس» گازەتى بولدى، قازىرگى «جاس الاشتىڭ» ارعى اتاسى، سول گازەتتە مەنشىكتى ءتىلشى بولىپ ىستەپ ءجۇردىم. مەنىڭ ۇستازىم، وسى جۋرنالدىڭ ماعان دەيىنگى رەداكتورى جانە ونىڭ قايتا جالعاسىپ شىعۋىنا بىردەن-ءبىر سەبەپشى بولعان جازۋشى، قۇنانباي تۋرالى تاريحي رومان جازعان ىرىسحان مۇسا ۇلى دەگەن اعامىز 1992-جىلى مەن «لەنينشىل جاستا» ءتىلشى بولىپ جۇرگەنىمدە: «اتاڭنىڭ جۋرنالىن شىعارايىق دەپ جاتىرمىز، وسىعان سەن جاۋاپتى حاتشى بولىپ كەلسەڭ قايتەدى؟»-دەپ شاقىردى. ول كەزدە مەنىڭ جاسىم وتىزدا، قىلشىلداپ تۇرعان جىگىتپىن، سودان الدى-ارتىما قاراماي كەلىسە كەتتىم. ول كەزدە جۋرنالدىڭ شىعۋى قۇر يدەيا، ەندى عانا دايىندالىپ شىعايىن دەپ جاتقان كەزى، قارجىسى جوق، دەگەنمەن دە، بالا كەزىمىزدەن انامىزدىڭ الديىمەن، بەسىكپەنەن بويىمىزعان سىڭگەن ابايدىڭ ونەگە-وسيەتى بار بولعاندىقتان، «لەنينشىل جاستاعى» قىزمەتىمدى تاستاي سالىپ، وسى جۋرنالعا جاۋاپتى حاتشى بولىپ كەلدىم.

– بۇل جۋرنالدىڭ باسقا ەمەس، 1992-جىلى قايتا ومىرگە كەلۋىنىڭ وزىندىك ءبىر سەبەبى بار ما؟

– 1991-جىلى تاۋەلسىزدىك الىپ، 1992-جىلى اياعىمىزدان نىق تۇرىپ، ەڭسەمىزدى تىكتەي باستادىق. وسى كەزدە ابايدىڭ 150 جىلدىق مەرەيتويى جاقىنداپ كەلە جاتتى، بارلىق وبلىستار وسى مەرەيتويعا ءوز ۇلەستەرىن قوسىپ جاتتى. سوندا سەمەيدىڭ ىرىسحان اعا باستاعان زيالىلارى جيىلىپ وتىرىپ: «ءبىزدىڭ قالامگەرلەردىڭ، جۋرناليستەردىڭ قوسقان ۇلەسى وسى بولسىن، ءبىز سوناۋ كەزدە ءولىپ قالعان اباي جۋرنالىن قايتا شىعارايىق» دەگەن اڭگىمە كوتەرىلدى. «ءجىپ ۇزىلسە ءتۇيىن، ءسوز ۇزىلسە قايتا سەپتەۋ قيىن ەكەنىن بىلە تۇرساق تا»،-دەپ جۋرنالدىڭ العى سوزىندە جازىلعانداي، جۋرنالدى قايتا ءتىرىلتىپ شىعارۋ وڭاي بولعان جوق. وعان قوسا بۇل عىلىمي باعىتتاعى جۋرنال بولۋ كەرەك، عالىمداردىڭ بارلىعىنا حات دايىندالدى، اقىلداستار القاسى قۇرىلدى، بارلىق ابايدى زەرتتەگەن اكادەميكتەرمەن كەلىسىپ، اسىرەسە، ىرىسبەك سارعوجين دەگەن عالىم ۇلكەن ءبىر ماقالا دايىنداپ، ونى «سەمەي تاڭىنا» باستىرىپ، بۇل جۋرنال قايتا شىعۋى كەرەك دەگەن اڭگىمە كوتەرۋ قاجەت بولدى. مۇنى ايتىپ وتىرعان سەبەپ، جۋرنالدى شىعارۋعا قارجى كەرەك، ول كەزدە وبلىس حاتشىسى كەشىرىم بوزتايەۆ ىرىسحان اعا بارعان كەزدە: «ەكى گازەتىڭە اقشانى ارەڭ تاۋىپ بەرىپ وتىرمىن، ەندى جۋرنال شىعارامىن دەگەنىڭ قالاي؟»، -دەپ قينالا جاۋاپ بەرگەنى دە ەسىمدە. ءبىراق، تۇسىنىستىكپەن قاراعان سوڭ، جۋرنال قايتا جارىققا شىقتى. ول كەزدە ءبىراز وندىرىستەردىڭ بار كەزى، زاۆود، فابريكالاردىڭ ارقاسىندا ەكى جىل سولاردىڭ قارجىسىمەن جۋرنال جارىق كورىپ وتىردى. 1994 -جىلدىڭ 13-مامىرىندا جۋرنالعا رەسپۋبليكالىق مارتەبە بەرىلىپ، رەسپۋبليكالىق بيۋدجەتكە الىنىپ، ونى تەحنيكامەن قامتاماسىز ەتۋ وبلىسقا تاپسىرىلىپ، جۋرنال قايتا ومىرگە كەلدى. سودان بەرى مىنە، 25 جىل ءوتتى.

2efadbb3b8ef1765bdcfefc698071875
– جۋرنالدى شىعارۋ ءۇشىن مەملەكەت تاراپىنان قانداي دا ءبىر كومەك كورسەتىلىپ جاتىر ما؟

– كەيىنگى 4-5 جىلدا استانا جۋرنالدى قارجىلاندىرۋدى قويدى، «اباي» جۋرنالىن شىعارعىلارى دا كەلمەيدى. «ابايدى» قاجەت ەتپەگەن ادامدار دا تابىلدى، ولاردىڭ اتىن اتاپ، ءتۇسىن تۇستەمەي-اق قويايىن. سونىمەن اندا-مىندا شاپقىلاپ، اقىرى جۋرنالدى شىعارۋ كەرەك، ولتىرمەۋ كەرەك، باسقا جاقتار جاڭا جۋرنالدار شىعارىپ جاتىر، شىعىپ تۇرعان جۋرنالدى استانا كومەكتەسپەدى ەكەن دەپ جاۋىپ تاستاۋعا بولمايدى عوي. ءسويتىپ، سەمەيدىڭ اكىمدەرى جىلى قاباق تانىتىپ، اقشانى ءۇيىپ تاستاماسا دا، جۋرنالدىڭ جابىلىپ قالماۋىنا قارجىسىن بەرىپ وتىر. ۇلىلاردىڭ ۇلگى-وسيەتى، اۋەزوۆ پەن ايماۋىتوۆ باستاپ بەرگەن جولدىڭ الدىندا ادالدىقپەن قىزمەت ەتىپ، كوزىمنىڭ تىرىسىندە جۋرنال جابىلماسا ەكەن دەيمىن. 1918-جىلى جۋرنالدىڭ جابىلىپ قالۋىنا كەڭەس وداعى كىنالى دەسەك، قازىر جۋرنال جابىلىپ قالسا وعان كىم كىنالى بولماق؟!

– جۋرنال قاي ايماقتارعا تارايدى؟

– جۋرنال رەسپۋبليكا بويىنشا تارايدى، شىعىس قازاقستان وبلىسىنىڭ الدا ەكەنى وزىنەن-ءوزى تۇسىنىكتى. سەمەي، اباي اۋدانى، جارما ءوڭىرى كوپ جازىلادى، قىزىلوردا بۇرىندارى جاقسى جازىلۋشى ەدى، كەيىنگى كەزدەرى ءبىراز تۇسىڭكىرەپ ءجۇر، شىمكەنتتىڭ قازاعى كوپ، شىمكەنت جاقسى جازىلاتىن شىعار دەپ ويلاپ ەدىم، باسىندا جاقسى باستالىپ ەدى، ەندى ءبىزدىڭ دە كىنامىز بار شىعار، اياعىمىز جەتپەي جاتادى.

– جۋرنالدىڭ نەگىزگى ماقساتى قانداي، ونىڭ قانداي بولىمدەرى بار، ولار قاي باعىتتا جۇمىس جاسايدى؟

– جۋرنالدىڭ نەگىزگى ۇستانعان ماقساتتارى بار، اباي جۋرنالىنىڭ ءىزباسار ءىنىسى بولعاندىقتان العاشقى «اباي» جۋرنالىنىڭ ۇستانعان باعىتىنان الىسقا اۋىتقىپ كەتكەن جوقپىز. بۇگىنگى ۇستانعان باعىتى دا ابايتانۋ، وعان اۋەزوۆتانۋ، شاكارىمتانۋىمىز قوسىلادى. ءبىزدىڭ ماقساتتارىمىزدىڭ ءبىرى ولاردى بۇگىنگى كوزقاراس تۇرعىسىنان تارازىلاپ، تالداۋ. تاريحقا كەلگەندە الاش ارىستارىن دا ايتۋ مۇمكىندىگى تۋىپ وتىر. زامان اعىمىنا، ەركىندىككە قاراي جاڭادان تۋىپ جاتقان ايدارلار بار. ءبىر ابايتانۋدىڭ ءوزى جيىرما تاقىرىپپەن شىعادى، ابايدىڭ اقىندىعى، كومپوزيتورلىعى، ابايدىڭ ساحناداعى بەينەسىن سومداعان اكتەرلار، ءانىن شىرقاعان كومپوزيتورلار سولاي-سولاي تارامدالىپ كەتە بەرەدى. ودان كەيىن ەڭ ءبىر نەگىزگى دۇنيە ابايدىڭ وسىعان دەيىنگى شىققان جيناقتارى. ءبىزدىڭ «قۇبىلامىز» اباي بولسا، تەمىرقازىعىمىز مۇحتار اۋەزوۆ. مۇحاڭنىڭ موناگرافياسى مەنىڭ ۇستەلىمنىڭ ۇستىنەن ءتۇسىپ كورگەن جوق، سول بويىنشا جۇمىس جاسايمىز. ەركىندىك العان سوڭ «قيىردان كەلگەن قانداستار» دەگەن رۋبريكا اشىلدى، وعان شەتتە جۇرگەن اعايىندارىمىزدىڭ، سول ەلدەگى ىلگەرى، مىقتى اقىندار، عالىمدار بار، سولاردىڭ شىعارمالارىن بەرۋگە تىرىسامىز. فاريزا اپايىمىز ءبىر كەلگەننىڭ وزىندە ءبىر رۋبريكا اشىپ بەردى، بىزگە وي سالىپ كەتتى. ول كەزدە جاعداي قيىن، رەسەي باسىلىمىندا بۇرىنعى «نوۆىي مير»، «ليتەراتۋرنايا گازەتا»، «لەنينگراد» سياقتى ۇلكەن-ۇلكەن جۋرنالداردى قازاق حالقى جازدىرىپ الا المايتىن دارەجەدە بولدى. سوندىقتان، الەم ادەبيەتىندە جارقىراپ جۇرگەن كلاسسيكالىق تۋىندىلاردى نەگە بەرمەيسىزدەر دەگەن ءبىر ويدى ايتقان. كەيىننەن مەن سول ويدى ءىلىپ الا قويىپ «جاھان ادەبيەتىنىڭ جاۋھارلارى» دەگەن رۋبريكا اشىپ، شەتەل ادەبيەتىنىڭ بىلگىرى ايگۇل كەمەلبايەۆا دەگەن قىزمەتكەرىممەن بىرگە ەڭ تاڭداۋلى، ەڭ مىقتى دەگەن كلاسسيكتەردى شامامىز كەلگەنشە اۋدارىپ، جاريالاۋعا تىرىستىق. جۋرنال ەكى ايدا ءبىر شىعادى، وسى كۇنگە دەيىن جۋرنالدىڭ 121 سانى جارىق كوردى. بۇل جۋرنالدى ابايدىڭ تويىنا ارناپ شىعاردىق قوي، ول توي دا وتەر، سول تويدا ابايدى كەرەك قىلدىق تا، توي وتكەن سوڭ ابايدى قايتا ۇمىتقان كەزىمىز دە بار. ءبىز سول كەزدە جۋرنالدىڭ توبەسىنە «ءبىرىڭدىع قازاق، ءبىرىڭ دوس كورمەسەڭ، ءىستىڭ ءبارى-بوس» دەگەن ابايدىڭ ءوز ءسوزىن قويدىق. ونى قويعانداعى ماقساتىمىز، سول كەزدەگى بيلىك باسىندا جۇرگەن، ءىس تەتىگىن ۇستاپ وتىرعان ۇلكەن ازاماتتارعا، اسىرەسە باسشىلارعا كومەك رەتىندە جازدىق. الدىمەن ءوز ىشىمىزدەگى بەرەكە-بىرلىك بولماي، وزگەنى جەڭە قويامىز دەگەنگە مەن ءالى كۇنگە دەيىن سەنبەيمىن. حالقىمىزدىڭ بەرەكە-بىرلىگىنە ابايدىڭ ونەگە-وسيەتتەرىن الدىعا سالا وتىرىپ ءالى دە ۇلەس قوسۋ باستى ماقساتىمىز. قازىرگى قازاق ادەبيەتىنىڭ ەڭ ۇزدىك دەگەن تۋىندىلارىمەن وقىرماندى تانىستىرۋ، اسىرەسە كەيىنگى جاس اۆتورلارعا قولداۋ كورسەتۋ، جاقسى شىعارمالارىن جاريالاۋ. وسى ءتاۋىر-اۋ دەگەن جاس اۆتورلاردى ءوزىم ىزدەپ ءجۇرىپ، تەلەفون شالىپ تاۋىپ الىپ، جازعاندارىڭ بولسا بىزگە بەرشى دەپ سۇراپ وتىرامىن. ودان كەيىن ەلدىڭ الەۋمەتتىك-ەكونوميكالىق ىلگەرىلەۋ جولدارى، تاريحي وقيعالاردى تالداپ-تۇسىندىرەتىن كوسەمسوزدىك ماقالالار كەرەك. ول ءۇشىن قازاقستانداعى بەلگىلى ەكونوميست، ادەبيەتشى، تاريحشى عالىمدارمەن بايلانىس ورناتىپ، جۋرنالعا اۆتور رەتىندە تارتىپ وتىرامىز. تاس تۇسكەن جەرىنە اۋىر دەمەكشى، سەمەي قالاسىندا وتكەن جارقىن ىستەردى دە جاريالاپ وتىرامىز. جاستار ابايتانۋعا بارا بەرمەيدى، كەيىنگى بۋىن اۋىردىڭ ۇستىمەن، جەڭىلدىڭ استىمەن جۇرۋگە، جىلدام جارقىراپ جۇلدىز بولىپ تانىلا قويۋعا بەيىم. ابايتانۋعا يىقتارى ارقالاپ جۇرە المايتىن بولعاننان كەيىن جاسقانشاقتاپ بارماي ما دەپ تە ويلايمىن.

– جۋرنالدىڭ تۇراقتى اۆتورلارى دەپ كىمدەردى اتار ەدىڭىز؟

– تۇراقتى اۆتورلار ەلىمىزدەگى بەلگىلى اكادەميك عالىمداردان باستاپ، استاناداعى ەۋرازيا ۇلتتىق ۋنيۆەرسيتەتىنىڭ وقىتۋشىلارى ديحان قامزابەك، تۇرسىن جۇرتباي اعالارىمىز ءتۇتىنىن ۇزبەي ماتەريالدار بەرىپ تۇرادى. جوق مەن ابايدى جازبايمىن دەگەن بىردە-ءبىر عالىمدى ەستىگەن جوقپىن. عاريفوللا ەسىم اعامىز كوپ ارالاستى. ابايدىڭ فيلوسوفيالىق، حاكىمدىك تۇرعىداعى دۇنيەلەرىنىڭ توڭىرەگىندەگى ماتەريالدارى ەڭ العاش وسى «اباي» جۋرنالىنا شىقتى. ابايدىڭ ءار ءسوزىن تالداپ، ءار كورىنىسىنە توقتالاتىن دۇنيەلەرى دە وسى جۋرنالعا شىقتى. تۇراقتى اۆتورلار بار، ءبىراق بىزدە ماسەلەنىڭ ەكىنشى جاعى دەگەن بار عوي، تۇراقتى اۆتورلارعا تۇراقتى قالاماقى بەرۋىمىز كەرەك. كەزىندە قالاماقى بەرگەندە عالىمدار دا ىنتالاندى، ال قازىر قالاماقى تۇگىل جالاقى بەرۋدىڭ ءوزى اۋىر.

– بيىل جۋرنالدىڭ جارىق كورە باستاعانىنا 25 جىل، نەگىزى قالانعانىنا كەلەسى جىلى ءجۇز جىل تولادى. وسىعان وراي قانداي ءىس-شارالار جوسپارلانۋدا؟

– بۇگىنگى كوزقاراسپەن ابايدىڭ جىلى بەلگىسىز ولەڭدەرىنىڭ جىلىن انىقتاپ جۋرنالعا بەرىپ جاتىرمىن. ونى ارى قاراي جالعاستىرساق دەگەن وي بار. بىزدە «اباي كىتاپحاناسى» دەگەن رۋبريكا بار، وندا اباي وقىعان كىتاپتار، ابايدى اقىندىق دارەجەدەن ويشىلدىق، حاكىمدىك دارەجەگە كوتەرگەن دۇنيەلەر جاريالانادى. ابايدى ابايلىق دارەجە كوتەرگەن ونىڭ ءبىلىمى، وقۋى، باتىس-شىعىستان سۋسىنداپ شىعۋى. وسىنىڭ بارلىعىن ءبىر ادامعا جازعىزسام دەپ ويلايمىن. جۋرنالدىڭ ون جىلدىق سانىندا بيبليوگرافيالىق كورسەتكىشىن شىعارتتىم، ەندى 25 جىلدىق كورسەتكىشىن شىعارتسام با دەپ ءجۇرمىن.

– جۋرنال ۇجىمى تۋرالى بىرەر ءسوز ايتىپ وتسەڭىز، «اباي» جۋرنالىنا ەرەكشە ەڭبەك سىڭىرگەن قانداي تۇلعالاردى اتاي الاسىز؟

– مەنىڭ الدىمداعى بۋىنداردىڭ بارلىعى ومىردەن ءوتىپ كەتتى. «اباي» جۋرنالى شىققان كەزدە سەمەيدە مەنىڭ ۇستازىم ىرىسحان مۇساۇلىنان باستاپ، مەرعالي يبرايەۆ، عازيز ساپايەۆ، قازىردە كوزى ءتىرى تاجىريبەلى جۋرناليست ءىلياس يساحانوۆ ءتارىزدى عالىمداردىڭ اراسىندا ەڭ كىشىسى مەن بولاتىنمىن. ىرىسحان اعا: «وسى جۋرنالدىڭ ماڭداي تەرمەن قالاي اشىلعانىن بىلەسىڭ، ەندى ءوزىڭ باس-كوز بول، جابىلىپ قالماۋىن قاداعالا»، -دەپ ماعان امانات ەتىپ كەتكەن ەدى. سول كەزدە ماعان ىرىسحان اعا جاقسى دەگەن قالامگەرلەردىڭ بارلىعىن جيناپ بەرگەن. سول ازاماتتاردى ۇستاۋعا تىرىستىم. ايگۇل كەمەلبايەۆا، ونىڭ ارتىنان ايتقانىم احمەتبەكوۆا ءتارىزدى قالامگەرلەرىم استاناعا كەتىپ قالدى. اسان وماروۆ دەگەن ازامات تا استاناعا كوشىپ، قايتا ورالدى. ەندى ونىمەن دە بىرلەسىپ قايتا جۇمىس جاسايمىز. قازىر قاسىمدا قالعان جاۋاپتى حاتشىم مۇراتبەك كەنەمولدين دەگەن ازامات بار. تاريحشى، مۇراعاتتىق دۇنيەلەرمەن جۇمىس جاسايتىن ازامات-امانتاي يسين، كوسەمسوزگە سالاتىن سايلاۋ تولەۋوۆ، ابايدىڭ ولەڭدەرىن، شاكارىمنىڭ پوەمالارىن اۋدارعان، ورىس تىلىنە جۇيرىك مۇرات سۇلتانبەكوۆ، مەدەۋ سارسەكە، مولدابەك جانبولاتوۆ سياقتى اقساقالداردان اقىل-كەڭەس سۇراپ تۇرامىن.

– جۋرنالدىڭ ۆەب-سايتىن اشۋ جوسپارىڭىزدا بار ما؟

– 100 جىلدىققا قارسى «اباي» جۋرنالىنىڭ سايتى اشىلۋى ىقتيمال. ول بۇگىنگى زاماننىڭ تالابى. ەكرانعا قاراپ وتىرىپ وقىلعان دۇنيە قاعازعا استىن سىزىپ وتىرىپ، كەرەك كەزىندە جاستىعىڭنىڭ استىنا سالىپ قويىپ قايتا وقىعان دۇنيەگە جەتپەيدى عوي. دەسەك تە، سايت اشۋ دەگەن بولاشاقتىڭ ءىسى.

– سۇحباتىڭىزعا راحمەت! «اباي» جۋرنالىنىڭ عۇمىرى ۇزاق بولسىن، شىعارماشىلىق تابىس تىلەيمىن.

بالنۇر قىزىربەك قىزى،

adebiportal. kz