ۋنيۆەرسيادا قوناقتارىن اتتاندىرىپ، ءوزىمىز قالىپ ءشاي ىشكەندە. . .

«اسىڭ باردا ەل تانى، بەرىپ جۇرىپ!»

kayrat-20170000
الاتاۋدىڭ ەتەگىندەگى ەرتەگى قالا الماتىدا تۇتانعان XXVIII دۇنيەجۇزىلىك قىسقى ۋنيۆەرسيادانىڭ الاۋى سوڭعى رەت لاپىل قاعىپ جالىن اتتى دا، دامىل تاپتى. ون ءبىر كۇن بويى الەم نازارى وڭتۇستىك استانامىزعا اۋعان ەدى. نامىستى قولدان بەرمەگەن قازاق ەلى الەمدىك دەڭگەيدەگى بۇل سپورتتىق شارانى دوس ءسۇيىنىپ، دۇشپان كۇيىنەتىندەي-اق دەڭگەيدە دۇركىرەتىپ وتكىزدى. بۇگىن ءبىز، توي ءوتىپ، قوناق كەتكەن سوڭ، ءوزىمىز وتىرىپ شاي ىشكەندە تاپ وسىلاي دەپ سەنىمدى تۇردە ايتا الامىز.

بۇكىلالەمدىك ستۋدەنتتەر سايىسىنا 60 قا جۋىق ەلدەن ەكى مىڭنان استام سپورتشى كەلىپ، سپورتتىڭ 12 ءتۇرى بويىنشا 85 مەدال جيىنتىعى ءۇشىن تارتىسقا ءتۇستى. مۇنىڭ سىرتىندا، جارىسقا ارنايى شاقىرىلعان مارتەبەلى مەيماندار، مامان-باپكەرلەر، سپورتشىلاردىڭ شاشباۋىن كوتەرگەن جانكۇيەرلەر، وسى ءدۇبىرلى دودانى پايدالانىپ، قازاقستاندى، ونىڭ ارۋ الماتىسىن كورىپ قالايىن دەپ كەلىپ قالعان ساياحاتشىلار سانى قانشاما بولدى دەسەڭىزشى؟! وسىنشاما ءنوپىر، سىناپ كەلگەن، قىزىققا كەنەلگىسى كەلگەن قالىڭ جۇرت الماتىنىڭ ايقارا قۇشاعىنا ەنىپ، قازاعىمنىڭ قوناقجاي پەيىلىن كورىپ، تويات تاپتى دەپ ويلايمىز.

«كەلگەنشە قوناق ۇيالادى، كەلگەن سوڭ ءۇي يەسى ۇيالادى» دەگەن راس. قوناق كۇتۋدەن الدىنا جان سالماعان قازاقى دارقاندىق تورتكۇل دۇنيە الدىندا ءبىزدىڭ مەرەيدى تاعى دا كوتەرىپ تاستادى. ۋنيۆەرسيادا تاريحىندا تۇڭعىش رەت الماتىدا تۇرعىن ۇيلەرىنىڭ توبەسى كوك تىرەگەن «اتلەتتەر اۋىلى» سالىندى. بۇل جايلى دا جىلى ۇيلەردە تۇرعان سپورتشىلاردىڭ تۇرمىستىق جاي-كۇيلەرىنىڭ جوعارى دەڭگەيدە بولعانىن كوزبەن كورىپ، قۇلاقپەن ەستىدىك تە.

ەلباسى نۇرسۇلتان ءابىش ۇلى نازاربايەۆ ءوزىنىڭ كەزەكتى جولداۋىندا 2020-جىلعا دەيىن قازاقستان حالقىنىڭ 30-پايىزعا جۋىعى بۇقارالىق سپورتقا تارتىلۋى ءتيىس دەگەن ناقتى تاپسىرما بەرگەن ەدى. وسى ۋنيۆەرسيادا ءۇشىن دەپ سالىنعان سپورتتىق نىساندار-«حالىق ارەنا» مەن «الماتى ارەنا» سپورت سارايلارى جانە باسقا دا عيماراتتار پرەزيدەنت مىندەتتەگەن مۇباراك شارۋانى ىسكە اسىرۋ جولىندا مۇلتىكسىز قىزمەت ەتەتىنىنە بەك سەنۋگە بولادى. نەگە دەسەڭىز، بۇگىنگى كۇندە ءبىزدىڭ حالىق سالاماتتى ءومىر سالتىن قالاپ، دەنە شىنىقتىرۋمەن تۇراقتى تۇردە اينالىسۋعا قاتتى دەن قويا باستادى. ونىڭ ۇستىنە اتالعان سپورتتىق عيماراتتار بوي كوتەرگەن الاتاۋ اۋدانىندا تۇرعىندار سانى بۇرىنعىدان ءبىر جارىم ەسەگە ارتىپ، بۇگىندە 200 مىڭ ادامعا جەتتى.

مىنە، «جاقسىدان-شاراپات» دەگەن، ەلىمىزدى الەمگە تاعى ءبىر مارتە تانىتقان ۋنيۆەرسيادا سىندى حالىقارالىق دەڭگەيدەگى اۋقىمدى سپورتتىق شارانىڭ ەلگە تيگىزەر پايداسىنىڭ ءبىر پاراسى وسىنداي. الماتىدان دۇنيەنىڭ تۇپكىر-تۇپكىرىندەگى ءوز ەلدەرىنە اتتانعان ورەندەردىڭ جۇرەگىندە تۇتانعان قازاقستانعا، ارۋ الماتىعا دەگەن ماحاببات وتىنىڭ كوپكە دەيىن شۇعىلا شاشىپ، شارتاراپقا تارارىنا سەنگىڭ كەلەدى. سولاردىڭ كوبىنىڭ اراعا ۋاقىت سالىپ، ساياحاتشى ەسەبىندە الماتىعا ات شالدىرماسىنا كىم كەپىل؟

الماتى-2017 قىسقى ۋنيۆەرسياداسىنىڭ اشىلۋ جانە جابىلۋ سالتاناتتارىنا، جارىستى ۇيىمداستىرۋداعى شارۋانى ۇرشىقشا ۇيىرە بىلگەن ىسكەرلىگىمىزگە قاراپ وتىرىپ، شىركىن-اي دەپ، بەيجىڭگە بۇيىرعان 2022-جىلعى وليمپيادانىڭ بىزدە وتپەيتىندىگىنە شىن وكىنگەنىمىز راس ەدى. دەگەنمەن، «يگىلىكتىڭ ەرتە-كەشى جوق»، ءتورتجىلدىقتىڭ باستى دوداسى ءتۇبى ءبىر الماتىنى تابارى ءسوزسىز دەگەنگە سەنگىمىز كەلەدى.

قازاقتان ءسوز قالعان با؟! «اتىڭ باردا جەر تانى جەلىپ ءجۇرىپ، اسىڭ باردا ەل تانى بەرىپ ءجۇرىپ» دەيدى. ءيا، ءبىز قىسقى ۋنيۆەرسيادانى ەكونوميكالىق مۇمكىندىكتەر شومىشتەن قىسقان كەزدە وتكىزدىك. ويتپەسكە تاعى بولمادى: الەم بىزگە «ءالىڭ سەنىڭ قاندايلىق؟» دەگەن سىڭايدا سىناي قاراپ وتىرعانداي بولاتىن. ەلدىڭ ءيميدجى الدەكىمدەر الدىندا باسىن يمەس ءۇشىن وسىنداي نارتاۋەكەلگە بەل بۋعانىمىز دا راس ەدى. ويبايعا اتتان قوسقاندارعا قاراتا ايتار بولساق، بۇل-ەلدىككە سىن بولارلىق ەرەن شارۋا ەدى. مۇنىڭ شىعىنى دا از ەمەس، ءبىراق بەرەرى ونى ون وراپ الارى ءسوزسىز. نەگە دەسەڭىز، الەمدىك سپورت قاۋىمداستىعى ءۇشىن ءبىزدىڭ ەل سەنىمدى ارىپتەسكە اينالدى، تۋريستەر ءۇشىن ءبىزدىڭ جەر تاڭعاجايىبى تاۋسىلماس جۇماقتاي اسەر قالدىردى، قىسقى سپورت ءۇشىن الماتىمىز تاپتىرماس پلاتفورما-الاڭقاي رەتىندە تانىلدى. ال «قوياندى» جارمەڭكەسىندەگىدەي جۇرت ويدان-قىردان اعىلعان جەردىڭ قۇت-بەرەكەسى قاشاندا مول بولادى!

بۇگىندە «ماڭگىلىك ەلىمىز» دامىعان 30 مەملەكەتتىڭ قاتارىنا قوسىلۋدى مۇرات ەتىپ وتىر. بۇل ساناتقا ىلىگۋدەگى كوپ جولدىڭ ءبىرى-تانىمالدىلىق بولسا كەرەك. ولاي بولسا، اۋقىمدى جوبالاردا باق سىناپ، القالى جۇرت-ايداي الەمنىڭ الدىندا ءدال وسىنداي ءىرى ىسىمىزبەن تانىلا بەرگەننەن ۇتپاساق، ۇتىلماسىمىز انىق.

قايرات ءابىلدينوۆ، «ەگەمەن قازاقستان»

پىكىر جازۋ