Инновациялық көрмеде «Jarqyn» смарт мектебі оқушыларының химия, биология, экология, ақпараттану, қазақ тілі, тарих, география, сурет, ағылшын тілі т.б. пәндерден жазған ғылыми жобалары қойылыпты. Осының ішінде Есіл суын тазалау, киіктерді сақтау мен лайықты көбейту, елорда көшелерінің тарихы, Алаш тұлғалары бейнесін жіппен өріп салу т.б. тың жобалар іс-шараға қатысушы қауымды айрықша қызықтырды. Ең бастысы, осы еңбектердің авторлары өз ұсыныстарын жүйелі, тартымды жеткізе алды.
«Jarqyn» смарт мектебінің директоры Дәурен Маханов: «Қазір мектептен мектептің айырмасы – бәсекеге қабілетті оқушыны даярлап, түлетіп ұшыруда. Біз – әрқашан ізденетін, әрбір оқушының тамыр соғысын түсінетін ұжымбыз. Білім, отаншылдық тәрбие, заманауи технологияның меңгерту үйлессе, алмайтын асуымыз жоқ. Мектептің ата-анамен тығыз байланыста жұмыс істеуінің мысалы – осы іс-шара. Әр бала – біздің жарқынымыз» деп, ұжымның алға қойған мақсат-міндетін қысқаша айтып берді. Мектеп қамқоршыларының төрағасы Нұрлан Әлжанқұлов: «Баласын ойлаған мемлекет, қоғам – болашаққа қам жейді деген сөз. Біз «Jarqyn» смарт мектебін құрамыз, ашамыз дегенде, осы идеямызға сенген азаматтар, міне, әлі де жанымызда. Президентіміз Ұлттық құрылтайда жас ұрпақ тәрбиесіне, біліміне, тіпті қандай кітап оқитынына дейін назар аударуды қатаң тапсырды. «Jarqyn» – жас педагогтердің әрі ізденіс, әрі тәжірибе алаңы. Олар әр оқушының қай салаға бейімін ерте аңғарып, соны дамытуға күш-жігер жұмсап отыр. Смарт – ақылды деген сөз. Бұл ақыл ғылыммен, сондай-ақ спортпен, өнегелі тәрбиемен артады. Ата-аналарға да ерекше ризашылығымды жеткіземін!», деді.
Танымдық мәдени іс-шарада елорданың бірнеше мектебін басқарған еңбек ардагері, мәслихаттың экс-депутаты З.Жүсіпова, техника ғылымдарының докторы, профессор Ә.Бәйдібеков, филология ғылымдарының докторы, профессор Д.Мықтыбек, Қазақстанның еңбек сіңірген қайраткері, әнші Қ.Мақанов, мектептің ата-аналар кеңесінің төрағасы Б.Шойбеков сөз алып, Астанадағы бағыты ерекше мектепке сәт-сапар тіледі. Педагог Зәуре Ғинаятқызы: «Jarqyn» мектебінің аяқ алысы бәрімізді қуантып отыр. Үш жыл аз да, көп те емес. Ең бастысы, нәтиже бар. А.Байтұрсынұлы «Балаға көп үйретем деп асықпай, аз да болса анық, нақты үйрету абзал» деген. Ұжым шағын болса, барлық пәнді үйрету, баланы жақсы тәрбиелеу айқын жүзеге асады. «Jarqyn» осыны көрсетіп отыр», деді.
Осынау іс-шараны оқушылардың өзі жүргізіп отырды. Сондай өнерпаз ұл-қыздардың музыкалық тартуы, домбыра оркестрінің күй шашуы, түрлі спорттық өнер үлгілері «Jarqyn» смарт мектебінің жан-жақты екенін көрсетті.
Бақытжан АЙДАРХАНҰЛЫ
