Бұл жөнінде Әлеуметтік медициналық сақтандыру қоры басқарма төрағасының орынбасары Светлана Пономарева тарқатып айтты.
«Енді Әлеуметтік медициналық сақтандыру қоры бес жыл бойы «Стационар жағдайында мамандандырылған медициналық көмек» түрі бойынша үздіксіз қызмет көрсетуде тәжірибесі бар жеткізушілермен ұзақмерзімді келісімшарт жасасады. Ол үшін жеткізушілердің денсаулық сақтау саласындағы жоғары немесе бірінші санатты аккредитация куәлігі болуға тиіс. Сонымен қатар банкроттық немесе таратылу процедурасына қатысы болмағаны жөн», деп түсіндірді С.Пономарева.
Яғни бұдан былай медициналық қызметтер көлемін бөлу кезінде ұзақмерзімді келісімшарт жасалатын субъектілерге басымдық беріледі. Денсаулық сақтау субъектісі өтінім беретін медициналық көмек түрлері немесе шарттары бойынша деректер базасын жыл сайын жаңартар кезде Әлеуметтік медициналық сақтандыру қоры олардың өндірістік базаларын тексереді.
Сонымен қатар денсаулық сақтау субъектілерін көмек түрлері бойынша көлемдерді орналастыру рәсіміне көшіруге қатысты өзгерістер енгізілді. Бұл қатарда қан орталықтарының қызметтерін көрсету, жедел медициналық көмек, санитарлық авиация қызметтерін көрсету, АИТВ жұқтырғандарға әлеуметтік-медициналық көмек көрсету, туберкулезбен ауыратын науқастарға әлеуметтік-медициналық көмек көрсету, психикалық бұзылыстары бар адамдарға әлеуметтік-медициналық көмек көрсету қызметтері бар. Қор басшылығы жаңа субъектілерді, жаңа медициналық көмек түрлері бойынша өтінім бергендерді сапалы іріктеу мақсатында аймақтық комиссия мүшелерінің медициналық ұйымдарды аралайтынын атап өтті. Медициналық көмекті сатып алу рәсімдерін реттейтін өзгерістердің ішінде аймақтық, республикалық комиссия мүшелеріне қойылатын біліктілік талаптары да қарастырылған.
