Мемлекет басшысы бекіткен 2015–2025 жылдарға арналған сыбайлас жемқорлыққа қарсы стратегияны іске асыру мақсатында қоғам белсенділерінің тікелей араласуымен жең ұшынан жалғасатын жегі құрттың тамырына балта шабу үшін арнайы топ құрылып, қызметке кіріскені белгілі. Аталған топтың кезекті басқосуына жетекшілік еткен Нұрлан Ерімбетов осы күндері Қаржы министрлігінің сыбайлас жемқорлыққа қарсы жүргізіп отырған жұмысы көңіл көншітпейтінін айтып, сын тезіне алды. Ал Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары Алик Шпекбаев Арнайы топ өкілдерімен жүргізілген бірлескен талдау қорытындысы кейбір органдардың заңнамалық актілерде және ұйымдастырушылық-басқарушылық қызметінде бірқатар сыбайлас жемқорлық тәуекелдерін анықтағанын мәлімдеді.
«Тәуекелдердің жартысынан көбі мемлекеттік органдардың өз қызметінде басшылыққа алатын нормативтік-құқықтық актілерде анықталған. Біз мұны агенттік пен «Атамекен» ұлттық кәсіпкерлер палатасымен бірлескен жол картасын іске асыру нәтижелерін тәуелсіз сарапшылармен қарастыру барысында сыбайлас жемқорлыққа қарсы ауқымды шараларға жүргізілген талдау-сараптама деректеріне сүйене отырып айтқымыз келеді», деді ол.
А.Шпекбаевтың айтуынша, елімізде бизнесті дамытумен байланысты мемлекеттік органдар қызметінің 16 саласы жыл басынан бері мұқият зерттелген. Талдау нәтижесінде, жемқорлық оқиғасын жою жөнінде 280 ұсыным қабылданған болса, оның 62 пайызы (174) түрлі деңгейдегі нормативтік-құқықтық актілерге өзгерістер енгізуді құптайды. Қалған 38 пайызында мемлекеттік қызметтерді көрсету салаларын реттеу, бақылау және рұқсат беру функциялары мен мемлекеттік сатып алуды өткізу процедуралары және персоналмен жұмыс жүргізуге қатысты ұсынымдар болып табылады екен.
Жиын барысында кеден қызметінің жұмыскерлерін портативті бейнетіркеулермен қамтамасыз ету нормаларын бекіте отырып, оны нақты қолданысқа енгізбесе, аталған саладағы сыбайлас жемқорлық әрекеттерін азайту мүмкін еместігі де айтылды. Мемлекеттік кірістер комитеті қызметкерлерінің жұмысына айқындық пен ашықтық құралдарын енгізу маңыздылығы жөніндегі пікірді арнайы баяндама жасаған Сыбайлас жемқорлыққа қарсы саясат департаментінің директоры Салауат Мүксімов білдірді.
Өз кезегінде сөз алған Қаржы министрінің орынбасары Бауыржан Тортаев министрлік бекітілген жоспар бойынша іс-шаралар легі жыл соңына дейін толық іске асырылатындығына сендіріп бақты.
«Кеден қызметінің жұмысшылары үшін бейнетіркеулерді алу құжатына қазіргі кезде қол қойылған. Салықтық және кедендік әкімшілендіру жөніндегі «Астана-1» ақпараттық жүйесі қорытынды тестілеу деңгейлерінен өтуде және бұл жүйе де жақын күндері іске қосылатын болады», деді Б.Тортаев.
Отырыс қорытындысында Арнайы мониторингтеу тобының мүшелері Қаржы министрлігіне Сыбайлас жемқорлыққа қарсы стратегияны жүзеге асыруға қатысты агенттік ұсынымдарын орындау қажеттігін ескертті. Сонымен қатар, мұндай талап-тілектер қаперге алынбаған жағдайда жауапты лауазымды тұлғаларды тәртіптік жауапкершілікке тарту жөнінде агенттік атынан Президент Әкімшілігі мен Үкіметке арнайы хат жолдау жайы да айтылды.
Нұрлыбек ДОСЫБАЙ,
«Егемен Қазақстан»
