Парламент Сенатының депутаттары Бақытжан Жұмағұлов, Динар Нөкетаева және Төлеубек Мұқашев Алматыда Қазақ мемлекеттік қыздар педагогикалық университетінің оқытушылары және студенттерімен кездесті.
Сенаттың Әлеуметтік-мәдени даму және ғылым комитетінің мүшесі Бақытжан Жұмағұлов Жолдауда айтылған ауқымды жұмыстарды рет-ретімен түсіндірді. Сонымен қатар жоғары оқу орындарының сапасын арттыру, ұстаз мәртебесін көтеру жайында да кеңінен тоқталып өтті. Ал Д.Нөкетаева өзі алты жыл басшылық жасаған Қыздар университетінің мәртебесі туралы баяндады.
Жиын барысында студенттер Жолдау басымдықтары жөнінде сауалдар қойып, ұсыныстарын жеткізді.
* * *
Мәжіліс депутаттары Жанат Жарасов, Ерсұлтан Бектұрғанов және Тарас Хитуов Шығыс Қазақстан облысындағы сайлаушылармен кездесті. Ауыл тұрғындарымен кездесуде депутаттар Жолдаудағы зейнетақы, жалақы, денсаулық сақтау, білім беру салаларындағы мемлекеттік қызмет көрсетудің қолжетімділігі мәселелеріне ерекше көңіл аударды.
Одан әрі «Үлбі металлургиялық зауытының» ұжымымен кездесіп, тұрғын үй-коммуналдық шаруашылық, міндетті әлеуметтік сақтандыру жүйесін енгізу, балаларға арналған спорт секциялары сияқты көптеген мәселелерді талқылады.
* * *
Парламент Сенатының депутаты Әлімжан Құртаев Елбасы Жолдауын түсіндіру мақсатында Түркістан облысындағы Мақтаарал ауданының басшылығымен кездесті. Сенатор өмір сапасын жақсарту, халыққа қолайлы жағдай жасау және кәсіби мемлекеттік аппаратты қалыптастыруға қатысты Жолдауда айқындалған міндеттерді егжей-тегжейлі түсіндірді.
Мақтаарал аудандық мәслихатының депутаты, академик Ибадулла Үмбетәлиев, аудандық мәслихаттың депутаты Берік Шәмшиев, аудандық мәслихат хатшысы Қадыр Сәрсекбаев аудан өміріне қатысты өзекті мәселелерді қозғады.
* * *
Мемлекет басшысы Жолдауын түсіндіру мақсатымен Алматыға келген Мәжіліс депутаты Зағипа Балиева Open Almaty ұжымымен кездесті. Жолдауда инновациялық және сервистік секторларды дамытуға ерекше көңіл бөлу, «болашақ экономикасының» баламалы энергетика, жаңа материалдар, биомедицина, үлкен деректер, заттар интернеті, жасанды интеллект, блокчейн және басқа да бағыттарын ілгерілетуді қамтамасыз ету қажеттігі айтылған болатын. З.Балиева осы шараларды іске асыруда Open Almaty-ның маңызы зор екенін атап өтті.
Депутат өзінің сөзінде «халықпен жұмыс істеудің жаңа заманауи форматтарын енгізуді міндетіне алған полицияның бұл тұрғыда Open Almaty-дан үлгі алуына болатынын атап өтті.
* * *
Сенат депутаты Рысқали Әбдікеров Елбасы Жолдауының негізгі ережелерін түсіндіру мақсатымен Қарағанды облысына жұмыс сапарымен келді. Сапар барысында ол Шахтинск қаласындағы бірқатар мемлекеттік мекемелердің, шағын және орта бизнес нысандарының тыныс-тіршілігімен танысты.
Сенатор қаладағы Ә.Бөкейханов атындағы мектеп-лицейдегі кездесу барысында Жолдауда Мемлекет басшысы алға қойған негізгі міндеттерді жан-жақты түсіндірді. Елбасының тапсырмасын орындау аясында педагогтардың мәртебесін, еңбекақысын, білім беру сапасын арттыру, сондай-ақ оқушыларға және мұғалімдерге қажетті жағдай жасалатыны, мектепке дейінгі білім беру қамтуын кеңейту жөнінде жұмыстар жүргізілетіні атап өтілді.
* * *
Шығыс Қазақстан облысының орталығы – Өскемен қаласында Парламент Мәжілісінің депутаты Берік Дүйсенбинов Мемлекеттік кіріс департаментінің облыстық департаментінің ұжымымен, кәсіпкерлермен және қоғам өкілдерімен кездесті.
Жолдауда айтылған міндеттерді «Ақ жол» партиясы қолдайтынын жеткізген депутат салық саласындағы сұрақтарға жауап беріп, партия тарапынан атқарылып жатқан жұмыстар туралы айтты.
* * *
Сенат депутаттары Марат Тағымов пен Мұхтар Жұмағазиев Ақтөбе облысына жұмыс сапары аясында Темір ауданында болды. Елбасы Жолдауын насихаттауға ауданға арнайы келген ақпараттық топ мүшелері алдымен құрылысы жүріп жатқан «Ақтөбе – Атырау» тас жолының Темір ауданындағы бөлігінде болып, жұмыс барысымен танысты.
Олар аудан орталығындағы «Шұбарқұдық нан» наубайханасы мен «Ардақ» көтерме сауда орталығында да болды. Сондай-ақ аудан əкімдігі, прокуратура жəне ішкі істер бөлімінің қызметкерлерімен, Байғанин ауданының орталығы – Қарауылкелді ауылы халқымен жүздесіп, Жолдаудағы міндеттерді түсіндірді.
* * *
Мәжіліс депутаттары Ирина Унжакова және Павел Казанцев Қарағанды облысының Осакаров ауданына барды. Есіл ауылындағы жастармен кездескен депутаттар мемлекет тарапынан ауыл шаруашылығын дамытуға қалай көңіл бөлініп жатқанын айтып, агроөнеркәсіп кешенінің келешегіне назар аударды. Мемлекет басшысының Жолдауында айтылған басымдықтарға және Елбасының заңнамалық бастамаларын қамтамасыз ету үшін Парламент Мәжілісінің атқарып жатқан жұмыстары туралы баяндады.
Өз кезегінде депутаттар көтерілген проблемалардың барлығы бақылауға алынатынын жеткізді.
* * *
Мемлекет басшысы Жолдауын халыққа түсіндіріп, ондағы міндеттерді таразылау мақсатындағы республикалық ақпараттық насихаттық топ қатарында Парламент Сенатының депутаттары Бекмырза Еламанов пен Мұрат Бақтиярұлы Қызылорда облысының Сырдария ауданында жұмыс сапарымен болды.
Олар «Бақ» және «Қызылдихан» шаруа қожалығының жұмысшыларымен кездесті. Онда Жолдаудағы ауылшаруашылық саласына байланысты айтылған тапсырмалар жөнінде ой бөлісті.Сонымен қатар Парламент палаталарында қабылданып жатқан заңдарға байланысты туындаған сұрақтарға жауап берді.
* * *
Президент Жолдауын ел ішінде тереңірек ұғындырып, насихаттау мақсатында Парламент Сенатының депутаты Дәурен Әділбеков Ақмола облысындағы Викторовка ауылының тұрғындарымен кездесу өткізді.
Депутат Жолдаудың аса маңызды тұстарына, соның ішінде еңбекақы көлемінің өсуі, шағын және орта бизнесті одан әрі дамыту мәселелері, мектеп пен мектепке дейінгі мекемелердегі білім беру сапасын жақсарту, балалардың қауіпсіздігін қамтамасыз ету, денсаулық сақтау саласын цифрландыру тәрізді міндеттерге тоқталды.
Д.Әділбеков, сондай-ақ Зерендідегі жаңа емханада, Мәлік Ғабдуллин атындағы қазақ мектебінде болды. «Столяренко» жеке кәсіпкерліктің дәнекерлеу цехында жылыту қазандықтарын дайындап жатқан жұмысшылармен пікірлесті.
Ақпараттар «Егемен Қазақстанның» өңірлердегі тілшілерінен алынды
