Суретті түсірген Ерлан Омар, «EQ»
Кітап баға жетпес рухани құндылығымыз, аса зор мәдени байлығымыз екені жайлы небір ұлылар артына ғибратты сөздер қалдырған. «Кітап–ақылына ақы сұрамайтын асыл қазына» (Әлішер Науаи), «Адамдар кітап оқуын қойса, ойлауын да қояды» (Денри Дидро), «Жақсы кітап оқу – ақылды адаммен сырласқанмен бірдей» (Лев Толстой). Хакім Абай «артық ғылым кітапта, ерінбе оқып көруге» деп білімділікке шақырса, халқымыз «кітап – білім бұлағы» деп тобықтай сөзбен түйіндеген. Бұдан шығатын қорытынды, уақыт қанша өзгеріп, бүгінгідей озық технологиялар дәуіріне жетсек те кітаптың мән-маңызы, оған деген ынтызарлық, құмарлық жойылмақ емес. Бұл орайда адамның ішкі жан дүниесін, ой-санасын өсіруге, интеллектуалдық тұлғасын қалыптастыруға тікелей қызмет ететін кітапханалардың әлеуметтік-мәдени мекеме ретіндегі рөлі де, ықпалы да айрықша. Оның айқын бір үлгісін оқырмандардың жиі бас сұғатын сүйікті орнына айналып, кітап оқу мәдениеті арқылы ұлттық мәдени кодымызды жаңғыртуға белсене атсалысып келе жатқан Полтавка ауылдық кітапханасының тәжірибесінен анық байқауға болады.
– Бүгінгі оқырман сұранысын қанағаттандыру оңай емес. Бұл талғам үрдісінен көріну үшін материалдық-техникалық жағынан жақсы жабдықталып қана қоймай, рухани, эстетикалық әсер сыйлайтын, жас буынға қоғамды танып-білуге, нақты өмірге қажетті бағыт-бағдар беретін, жөн сілтейтін танымдық іс-шаралар жүйелі ұйымдастырылуы шарт. Сонда ғана ақпараттық қолжетімділікті қамтамасыз етуге, кітап оқу мәдениетін арттыруға, өскен орта, туған жер туралы нақты парасат-пайым түсінігін қалыптастыруға болады, – деді әңгімелескенімізде өңірде тірек орталығы саналатын мәдениет ошағының меңгерушісі Валентина Пак.
Валентина Викторовнаның айтуынша, «Полтавка» ЖШС-нің директоры, іскер басшы, «Құрмет» орденінің иегері Елтай Зікірин кітапхананы жаңа типтік ғимаратқа көшіріп, көпсалалы қондырғылар, кітап, көрме стеллаждарын, компьютер, телевизор, интерактивті тақта, аудио-бейне аппаратура сатып әперген. Сөйтіп облыста тұңғыш рет модельдік мәртебеге ие болған. Ересектер мен балалар тынығатын арнайы бөлме бар. «Рухани жаңғыру» бағдарламасы аясында өткен облыстық байқауда жүлдегер атанып, 200 мың теңге сыйақы жиhаз алуға жұмсалыпты. Былтыр «Рухани қазына» аталымы бойынша топ жарыпты. Мәрияш Шәріпованың басқаруындағы орталықтандырылған кітапханалар жүйесінің мамандары кәсіби-әдістемелік жағынан жәрдемдесіп, нақты көмектер беріп тұрады. Осылайша бірлесе іс-әрекет етудің арқасында елімізде де жақсы жағынан танылып, іс-тәжірибесі таратылыпты. Барлық әлеуметтік нысандар жұмыс істейтін Полтавка оқырманы көп елді мекендер санатында. Кітап оқуды өмірлік салтына айналдырған тұрғындар оқу залына жиі келіп, кез келген ақпаратпен танысып, қызықтыратын мәселелер төңірегінде ой-пікірлер алысып, тегін интернет желісін пайдалана алады. Бүгінде кітапхананың жалпы қорында алты мыңға жуық кітап сақтаулы. Қордың үлкен бөлігі қазақ, шетел классиктерінің туындыларына арналған. Әдістемелік-библиографиялық көрсеткіштер, өзге де көмекші құралдар молынан кездеседі. Жинақтау, есепке алу, құжаттарды жүйелеу, каталогтар ұйымдастыру ісі оңтайландырылған. Биыл 7342 оқырман кітапхана есігін ашып, 10084 кітап беріліпті. Бұдан бөлек 15 газет-журнал жаздырып алады. Әр жыл сайын жаңа әдебиеттің үш жүзден астам данасымен толығып отырады.
Кітапханашы Валентина оқырмандармен жанды байланыстың жаңа түрлерін барынша игеруді басты мақсат санайды. «Туған елдің Туы, Елтаңбасы, Әнұраны», «Олар Отан үшін шайқасты», «Ана тілің – арың бұл», «Бір ел – бір кітап», «Кәсібім осындай – әскер адам», «Гусардан арнайы жасаққа дейін» тағы сүбелі тақырыптар бойынша еске түсіру көрмелері, акциялар, диалог алаңдары, виртуалды саяхаттар, үнқатысулар, викториналар өткізіліп, бейнероликтер көрсетіліп, оқушыларды қазақстандық патриотизм рухында тәрбиелеу, Отанға қызмет ету дәстүрлерін жалғастыру, елін, жерін сүю, үлкенге құрмет, кішіге ізет, имани, адами қасиеттерді бағалау секілді танымдық мән-маңызымен ерекшеленген. Кітапхана жанында «Жүрек қартаймайды», «Қасиетті отбасы», «Кивис» ардагерлер, жастар, жасөспірімдер клубтары құрылған. Сәлима Жәкенова, Татьяна Батай, Лидия Сальникова сияқты еңбек ардагерлері байырғы оқырман ретінде кітаптың қадір-қасиетін насихаттаудан, атадан балаға мирас болып қалатын асыл құндылық екенін айтудан, оқуға кеңес беруден жалыққан емес.
Кітапханашы В.Пак тұрғындардың бос уақытын мазмұнды да қызықты өткізуге де уақыт тауып, жаңа форматтағы ақпараттық технологияларды барынша пайдаланып жүр. Оқырмандардың үзілмейтіні де сондықтан.
Солтүстік Қазақстан облысы,
Аққайың ауданы
