Бұрынғымен салыстырғанда елімізде қазір бұл бағытта біраз бастама бар. Мәселеге Мемлекет басшысы айрықша мән беріп, браконьерлікпен және орманды заңсыз отаумен күрес жүргізуді бақылау күшейе түсті.
Облыс әкімдігінің бастамасымен Арал теңізі акваториясындағы Жалаңаш көлін суға толтыру мәселесінің қарастырылуын біздің өңірдегі үлкен істің біріне жатқызар едім. Оны тіпті өз қаржысына жасауға ниетті жергілікті кәсіпкерлер де бар. Бұл жоба іске асса, біріншіден толып кетуіне байланысты қауіп төніп тұрған Көкарал бөгетіне қысым азаяды, екіншіден ұлы теңіз ұлтанына кетіп жатқан теңіз суы үлкен ойпатқа толады.
Көгалдандыру, қоршаған ортаны қорғау, табиғатты ластамау мемлекеттің ғана міндеті емес екенін естен шығармаған жөн. Бұл әрқайсымыздың ауламыздан, көшемізден басталуы керек. Осы бағыттағы нақты іс пен насихаттан кейін көгалдандыруға мән бере бастағандар қатары көбейгені қуантады. Ауласын, ауылын көркейтіп жатқан тұрғындардан үлгі алып жатқандар да аз емес.
Биылғы тағы бір жаңалық – облыс орталығында арық жүйесін жаңартып, парктер мен аллеяларға, көшелерге аяқ су жеткізу қолға алынды. Табиғат жанашырларының үмітін оятқан осы бастаманың аяқсыз қалмайтынына сенеміз. Басқа аудандар да осы үлгіні үрдіске айналдырса деген тілегіміз де жоқ емес.
Қазір Қызылорда бұрынғыдан көп өзгерді. Көше тазалығына мән беріліп, ұдайы назарда болып келеді. Енді сол тазалықтың сақталуы тұрғындардың жауапкершілігіне тікелей байланысты.
Жұртты табиғатқа жанашырлық танытуға баулу үшін көп қаржы қажет емес, тек ниет болса болды. Мысалы, азаматтардың қолдауымен екі көшенің тұрғындарын осы іске жұмылдырдық. Осы күні алғашқы көшедегі арық тазаланып, аяқ су берілді. Кәсіпкерлер де үлкен іске үлес қосып, Н.Назарбаев даңғылы бойындағы мешіт ауласына су құбырын жүргізуге көмек берді. Қазір ол аумақ саялы аллеяға айналды. Осының бәрі – көптің жұмылуымен біткен жұмыс. Табиғатқа жанашыр жандардың қозғалысы басталды, оның нәтижесі де көп күттірмейтіні анық.
Болат НҰРХОЖАЕВ,
өңірлік эко-амбассадор
Қызылорда облысы