Бүгінгі күнде облыстық төтенше жағдайлар департаменті (ТЖД) тұрғындарды қорғау мақсатында арнайы жоспар әзірлеп, таяуда оны жария етті. Құжатқа сәйкес, облыстағы 714 шақырым қашықтықты құрайтын жолдағы қар жиі алып қалатын 525 учаске күшейтілген бақылауға алынатын болады. Сондай-ақ қар құрсауында қалған адамдар үшін жылынатын 28 бекеттің жұмысы ұйымдастырылады. «Жалпы, қыс кезеңінде осы және басқа да құтқару жұмыстарын ұйымдастыруға 3070 адам мен 1200 техника бірлігі жұмылдырылатын болады», деп мәлімдеді облыстық ТЖД басшысының міндетін атқарушы Мұрат Қатпанов.
Қазіргі уақытта облыстық ТЖД қыс кезінде құтқару жұмыстарын іркіліссіз жүзеге асыруға жарамды техникамен біршама тәуір қамтамасыз етілген. Мысалы, құтқарушылардың гаражында омбы қарды, қатты боранды елең қылмайтын 87 бірлік жүрісі өнімді және инженерлік техника дайын тұр. Бұл техника түрлері көбіне қар қалың түсетін Теміртау, Осакаровка, Молодежный, Ақсу-Аюлы, Атасу өңірлері бағытында шоғырланған.
Жалпы, қыс кезінде адамдардың да қауіпсіздік шараларына мән беріп, сақ жүргені абзал. Жасыратыны жоқ, кейбір ағайын ауа райының қолайсыз екенін күні бұрын білгенімен бітпейтін шаруасын сылтау етіп, жолға шығып кетеді. Сөйтіп олар өздерін ғана емес, құтқарушыларды да әуре-сарсаңға салып қояды.
Бұдан бөлек мұз жұқа кезде су қоймалары мен өзендерге және көлдерге балық аулауға жаяу-жалпылап, көлікпен шығып кететін жұрт та аз емес. Мұндай кезде ойын баласын да бақылаусыз қалдырмаған жөн.
Сонымен қатар күн суытқанда тұрғындардың от жағып, электр жылытқыштарды қолданатыны белгілі. Дәл осындай кезде қауіпсіздік шараларына өте қатты мән беріп, сақ болған жөн. Мәселен, облыста жылыту маусымы басталғаннан бері жекеменшік тұрғын үй секторында 166 өрт оқиғасы тіркелген. Тілсіз жау бес адамның өмірін жалмады.
Таяуда ғана Қарағанды қаласындағы көпқабатты үйлердің бірінде болған өрт тілсіз жаудың сақтық шараларын сақтамаса қаншалықты қауіпті екенін көрсетті. Сол төтенше оқиға кезінде бір отбасының үш бірдей мүшесі жалын құшағында қалып, көз жұмды. Арасында жасқа толмаған сәби де болды. Кейін белгілі болғандай, аталған пәтердегі өрттің шығуына электр жылытқыш себепші болған екен.
Бүгінгі күнде облыста пешпен жылытылатын жер үйлерде тұратын азаматтардың өмірін қауіпсіз ету үшін құтқарушылар тарапынан біршама шаруалар атқарылып та жатыр. Мысалы, 2020 жылдың тамыз айынан бері көпбалалы, әлеуметтік жағынан аз қамтылған отбасылардың үйлеріне жергілікті атқарушы билік пен үкіметтік емес ұйымдардың көмегімен 230 автономды дабыл қаққыш орнатылған.
Қарағанды облысы