«Мұғалімдер мен оқытушыларды ұмытпағандары үшін үлкен рахмет айтамын. Біз бұл күнді асыға күттік. Пәтер өте жылы, ыңғайлы», деді оқытушы Лаура Өтепбергенова.
Үш баланың анасы Бағила Ыдырысова да елордадағы жаңа пәтердің кілтін алды. Ол пәтердің кілтін тапсыратыны туралы хабар алған кезде қатты қуанғанын жасырмады. «Тұрғын үй кезегінде тұрдық. Бүкіл отбасымызбен өте қуаныштымыз. Маған: «келіп, пәтерді таңдап алыңыз», деп хабарлағанда, бақыттан жылап жібердім. Қазір біздің пәтеріміз бар екеніне өте қуаныштымын», деп ағынан жарылды педагог Бағила Ыдырысова.
Педагогтер тұрғын үйді «Нұрлы жер» мемлекеттік бағдарламасы аясында және Білім және ғылым министрлігі мен «Қазақстан ипотекалық компаниясы» АҚ арасындағы меморандум шеңберінде алды.
«Жыл соңында, еліміздің ең басты мерекесі – Қазақстан Республикасының Тәуелсіздік күні біздің әріптес-педагогтеріміз жаңа пәтердің кілттерін алды. Ақтөбе, Ақтау, Алматы, Қарағанды қалаларында да шамамен 200-ден астам педагог жаңа пәтерге ие болды. Біз әріптестеріміздің осы мереке қарсаңында жаңа пәтерге орналасқанына өте қуаныштымыз. Әрине енді біздің әріптестеріміз тұрғын үй мәселелеріне алаңдамайтын болады. Бұл – баршамыз үшін үлкен қуаныш», деді Білім және ғылым вице-министрі Шолпан Каринова.
