Қазақстанда тұратын украиндардың салт-дәстүрін, әдет-ғұрпын және мәдениетін жаңғырту, өңірдегі этностар достығы мен өзара келісімді нығайту, Тәуелсіз Қазақстан елінің мәдени және экономикалық даму үрдісіне украиндықтарды тарту бойынша жұмыстарды ұйымдастырып отырған бұл бірлестіктің әрбір мүшесі өздерінің Қазақ елінде өсіп-өніп отырғандарын мақтанышпен айтып жүреді. Мәселен, аталған бірлестіктің белсенді мүшесі Анатолий Васильевич Неумывако Қазақстан өз отбасы үшін құтты мекен болғанын айтады.
– Иә, біздің әулетіміз қазақ жерінде бір ғасырдан астам өмір сүріп келеді. Осы жерде туып-өсіп, білім алып, отбасын құрып, қызмет етудеміз. Осы елдің азаматы ретінде қазақ халқына шын жүректен алғыс айтамын! – дейді ол.
Бір ғасыр демекші, 1907 жылы атасы Федор мен әжесі Домна қазақ жеріне, қазіргі Ертіс ауданына Украинаның Харьков губерниясынан көшіп келген екен. Аштық жылдарын, сталиндік қуғын-сүргінді, Екінші дүниежүзілік соғыс кезіндегі қиындықтарды қазақ халқымен бірге бастан өткерген. Өздерінің украиналықтарға тән еңбекқорлығымен ұрпақ өсіріп, ата-анасы отбасындағы бес баламен әулет көбейтіп осы жерде мәңгі тұрақтап қалады.
– Мен өзім 1949 жылы Ертіс ауданы Сілеті ауылында дүниеге келдім. Мектепте білім алып, әскери борышымды өтеген соң, Павлодар педагогикалық институтын бітірдім. Алғашқы еңбек жолымды туған ауылымдағы мектепте ұстаздық қызметтен бастадым. Кейін облыс орталығына көшіп келіп, №17 мектепте мұғалім болдым, – дейді Анатолий Васильевич.
Бірақ ол қалалық тұрғын болса да туған жері – Ертіс ауданына жиі барып тұрады. Ондағы достары, оқушылары – олардың алды зейнетке де шығып үлгерді – әр келген сайын оны қуана қарсы алады.
Қазіргі кезде Анатолий Васильевич өзі мүшесі болып табылатын жергілікті бірлестіктегі «Халық хорының» әншісі. Бірлестік құрамына негізінен басқарма, ақсақалдар алқасы кіреді. Серіктестікте жастар қанаты, кітапхана, оқу залдары, украин шамшырағы жұмыс істейді.
Украин ұлттық орталығында «Халық хоры» коллективі, «Чаривни струны» бандуристер вокалды аспаптар ансамблі, «Лілея» және «Джэрэло» жастар вокалды ұжымдары, «Вэсэлка» хореографиялық ұжымы бар.
2019 жылы Анатолий Неумывако Ассамблеядағы өз әріптестері, ынтымағы жарасқан басқа да қоғамдық бірлестіктердегі достары ортасында 70 жасқа толған мерейтойын атап өтті. Әріптестері оның әншілік өнерін жақсы бағалайды, 1996 жылдан бастап қоғамдық бірлестіктің мәдени өміріне белсене араласады, түрлімәдени кештер, арнайы фестивальдарға қатысады. Анатолий Неумывако 150-ге жуық украин әндерін хормен де, жеке өзі де орындайды. Хор мүшелері украин әндерінен басқа, Абайдың, басқа да қазақ композиторларының әндерін орындайды.
– Екі ұл, бір қыз өсіріп, ер жеткіздік. Валентина Николаевна екеуіміз немерелерімізді тәрбиелеп отырмыз. Біз бақытты отбасымыз. Ел тәуелсіздігінің 30 жылдық мерейтойы қарсаңында барша отандастарыма құт-береке, бейбіт өмір тілеймін. «Ақылы көпті дау алмайды, досы көпті жау алмайды» демекші, еліміздегі этностардың достығы мен ынтымағын арттырып, туған жерімізді көркейтуге бәріміз бір кісідей атсалысайық дегім келеді, – дейді А.Неумывако.
Павлодар облысы
