Мақаладағы: «Біздің жұрт – тамырын жеті қат жер астына жіберген алып бәйтеректей өзінің күш-қуатын ғасырлар бойы Ұлы дала төсінен алған байырғы халық. Бабаларымыз бізге мұра қылып ұлан-ғайыр жер қалдырды» деген жолдарды оқығанда санама Елбасының: «Ұлы даланың жеті қыры» деген тұжырымдамасы сап ете қалды.
Жалпы, Нұрсұлтан Назарбаев қазақтың киелі жеті санын қастерлей білетін жан. Осы жуырда ғана Nur Otan партиясы Cаяси Кеңесінің алқалы жиынында да: «Елдіктің жеті тұғыры» атты қағидаттар жиынтығын ұсынып тұрып ол: «Бұл Елбасы ретіндегі менің жас ұрпаққа жолдар үндеуім», деген сөзді айтып еді. Бұл Жеті тұғырда да Елбасының көп нәрсені ұғындырғанын халық жоғары бағалағанын біз жақсы білеміз.
Мен «Тәуелсіздік тағылымы» мақаласын оқып отырып Елбасының бұған дейін толғана айтқан «Ұлы даланың жеті қыры» мен «Елдіктің жеті тұғыры» – туралы тұжырымдамаларының бір арнада тоғысып жатқанын сезіндім. Сондағы айтылған мәселелерді жеке-жеке жіліктеп келіп жіберсеңіз, әрқайысысының өзі бір-бір әлем болып шыға келері сөзсіз.
Иә, айтылған әрбір сөздің астарына жете үңіліп, жеке ой өре білу керек дегеннен шығады, мақалада айтылған: «Біздің еншімізге тарихымызда өз ауқымдылығы мен қиындығы жөнінен бұрын-соңды болып көрмеген жобаны жүзеге асыру – Сарыарқаның төріне, ерке Есілдің бойына ел қондырып, жаңа да әсем елорда салу мәртебесі бұйырды» деген сөзінен соң, иә, Нұр-Сұлтан қаласын көз алдыңызға елестетіп көріңізші. Рас, осы астананы сонда көшірудің өзі оңайшылықпен келе қойған жоқ. Біз оны жақсы білеміз. Арада қанша сөз, қанша әңгіме кетті. Олай айтылды, бұлай айтылды. Бірақ нәтижесінде болашақты алдын ала ойлай білген Нұрсұлтан Назарбаев халықты жете иландыра отырып, өзінің түпкі мақсатына жетті. Осы тұста мен Елбасының ізденімпаздығына байланысты бұл елорданың қатарына Түркістан облысының орталығы етіп құрылған Түркістан қаласының бүгінгі керемет келбетін ерекше атап өткен болар едім.
Мен Н.Назарбаев жазбаларын оқып отырып «Мәңгілік ел» идеясының жасампаздығына үлкен сенім артамын. Біздің бұл өмірдегі басты құндылығымыз ол бірінші Алла тағаланың қалауы, екінші Нұрсұлтан Назарбаевтың ерекше белсенділігі мен ойшыл іс-әрекет, ұйымдастыру қабілетінің арқасында қол жеткізген тәуелсіздігіміз. Тәуелсіздікті мәңгілікке сақтап қалу біздің және бізден кейінгі ұрпақтың да басты борышы екенін естен шығармауымыз керек.
Біз бақытты елміз. Айналамызға барлай қарап, шүкіршілікте болуымыз керек. Ел аман, жұрт тыныш. Елбасы толғана жазған бейбітшіліктің туын біз барынша биікке көтере түсуіміз керек.
Қысқасы, біз ынтымағы жарасқан, тәуелсіздігіміз кемелді, береке мен бақ қонған елміз. Ендігі жерде осы берік ынтымағымыз бен тәуелсіздігімізді ғұмырлы етіп сақтап қалу жолында күресе білуіміз керек. Ал ел үлкен сенім артып отырған бүгінгі күннің жастары еліміздің өркендеп өсіп, қанатын кеңге жайып, даму жолында еселі еңбек етіп, өзінен кейінгі ұрпақты да соңынан сенімді түрде ерте білуге тиіс.
Ал біз – ардагерлер, ізімізден ерген сол өскелең ұрпаққа өз білгеніміз бен өмірден көріп, түйген ақыл-кеңесімізді, тәуелсіздік тағылымын үнемі үзбей айтып жеткізіп, түсіндіріп отыруға тиіспіз.
Серікбай ТҰРЖАН,
еңбек ардагері
Түркістан облысы,
Бәйдібек ауданы
