Қайырымдылық акциясына аймақ басшысы Архимед Мұхамбетов те атсалысып, «Алтын алқа» иегері Жанат Шәкірова мен көпбалалы ана Анна Пинежскаяның үйіне кіріп шықты. Әкім көпбалалы аналарды Ұлыстың ұлы күнімен құттықтап, ұн, қант, күнбағыс майы, шай, жарма, макарон сияқты әлеуметтік маңызы бар азық-түлік түрлері мен балаларға таңсық тәтті өнім толы Наурыз қоржынын табыс етті.
– Жалғыз өзім бес бала тәрбиелеп отырмын. Ортаншы ұлымның мүгедектігі бар. Жағдайымыз жаман емес, балалардың тұрақты әлеуметтік жәрдемақысы бар. Оның сыртында, ай сайын тегін азық-түлік себеттерін алып отырамыз. Шынымды айтсам, мемлекет балаларыма әке орнына әке болып отыр. Әйтеуір, қамқорлығын аямайды. Міне, бүгін үйімізге аймақ басшысының өзі келіп, балаларым тәттіге қарық болып, қуанып мәре-сәре болып қалды. Былтыр қала әкімі келіп еді, биыл облыс әкімі келді. Балаларым Наурыз жақындағанда әкем қашан келеді деп емес, әкім қашан келеді деп сұрайды. Оған да шүкір. Бәріңізді Наурыз мерекесімен құттықтаймын!, – деді Анна Пинежская.
Қайырымдылық шарасына Amanat партиясының өкілдері де қатысуда. Партияның «Бақытты отбасы» жобасы аясында жергілікті кәсіпкерлер өңірдегі мұқтаж отбасылардың үй-жайын жөндеп беру, көмір және ағаш отынмен қамтамасыз ету, коммуналдық қызмет ақысын төлей алмай отырған борышкерлердің қарызын өтеу, газ құбырына қауіпсіздік құрылғысын орнату сияқты игі амалдарды қолға алып жатыр.
Қостанай облысы
