Вице-министр Жанель Кушукованың айтуынша, 2022 жылдың 5 айында Қазақстанның сыртқы саудасының оң динамикасы байқалады. Биыл қаңтар-мамырда сыртқы сауда айналымы 51,3 млрд долларды құрады. Экспорт өткен жылдың сәйкес кезеңімен салыстырғанда 59%-ға өсіп, 34,2 млрд доллар болды. Сондай-ақ Қазақстанның ЕАЭО елдерімен саудасы оң динамиканы көрсетуді жалғастыруда.
«Қазақстанның ЕАЭО бойынша әріптестерімен тауар айналымы 2022 жылдың 5 айында 10 млрд долларды құрады, бұл 2021 жылдың сәйкес кезеңімен салыстырғанда 5%-ға жоғары. ЕАЭО елдерінің нарықтарындағы қазақстандық тауарлар үшін кедергілерді жою бойынша жұмыс жалғасып жатыр», деді Ж.Кушукова.
Сауда және интеграция вице-министрі Әсел Жанасова бүгінгі таңда министрлік 9 цифрлы жобаны іске асырып жатқанын хабарлады. Олардың арасында төлем жүйесі бар әлеуметтік әмиянды енгізу де бар.
«Бүгінгі таңда «әлеуметтік әмиян» бойынша қанатқақты жобаны жүргізу жұмыстары мүдделі мемлекеттік органдардың, ұйымдардың және ЕДБ-ның қатысуымен жалғасып жатыр», деді Ә.Жанасова.
Сонымен қатар Б.Сұлтанов жыл соңына дейін мүдделі органдармен, ұйымдармен және ЕДБ-мен бірлесіп «Әлеуметтік әмиянды» енгізу қажеттігін атап өтті.
«Жобаны іске асыру оларды пайдалану тиімділігінің мониторингін қамтамасыз ете отырып, халықты әлеуметтік қолдау қаражатын бөлудің цифрлы құралын жылдам құруды қамтамасыз етеді», деді Б.Сұлтанов.
Алқа отырысы барысында Сауда комитетінің төрағасы Ержан Қазанбаев та баяндама жасады. Оның айтуынша, ішкі тауар айналымы өсті. Осы жылдың қаңтар-маусым айларында тауар айналымының көлемі 20,6 трлн теңгені құрады. Оның ішінде бөлшек саудада 6,1 трлн теңге, көтерме саудада 14,5 трлн теңге болды.
Қазіргі уақытта комитет 3 негізгі бағыт бойынша жұмыс жүргізіп жатыр:
– сауда саласын дамыту мәселелері бойынша мемлекеттік саясатты жетілдіру;
– сауда инфрақұрылымын дамыту;
– азық-түлік тауарларына бағаларды тұрақтандыру мәселелері бойынша бірыңғай мемлекеттік саясатты іске асыруды қамтамасыз ету.
Сонымен қатар Б.Сұлтанов Сауда комитетінің төрағасына Ауыл шаруашылығы министрлігінің қант саласын дамыту бойынша кешенді жоспар әзірлеу жұмысына белсенді қатысуды тапсырды. Ол импортқа тәуелділікті едәуір азайтуға және өзін-өзі қамтамасыз етуге біртіндеп көшуге бағытталуы керек екенін атап өтті. Сондай-ақ мүдделі инвесторларды тарта отырып, КТО желісі бар Ұлттық тауар өткізу жүйесін іске қосуды жеделдету қажет.
Алқа отырысы барысында ТРМК төрағасы Арман Әбенов, ТҚҚК төрағасының орынбасары Алмас Әбжаппаров және СИМ аппарат басшысы Жәнібек Нөпіров министрлік қызметінің мәселелері бойынша баяндама жасады.
Сауда және интеграция министрі отырысты қорытындылай келе, вице-министрлер мен комитет төрағаларына барлық қабылданған міндеттемелерді, оның ішінде Мемлекет басшысының жаңа тапсырмаларын уақтылы және сапалы орындауды қамтамасыз етуді тапсырды. Сондай-ақ ел Үкіметінің кеңейтілген отырысында Мемлекет басшысының сынына байланысты Сауда комитеті басшылығының жауапкершілігін қарау тапсырылды.
