Қоғамдық қабылдау «Халық үніне құлақ асатын мемлекет» тұжырымдамасы аясында студенттермен, ұжыммен, қоғаммен байланыс орнату үшін құрылды. Заманауи ақпараттық технологияларды қолдану – қарым-қатынастың жаңа форматы. Қоғамдық қабылдау бөлмесінің ерекшелігі, өтінішті оффлайн режімде ғана емес, сонымен қатар университеттің барлық оқу ғимаратында, жатақханаларында орналасқан QR коды арқылы онлайн режімінде де беруге болады. Арнайы QR кодын сканерлеп, сұраулар мен ұсыныстарды жіберу жеткілікті. Сұрақ автоматты түрде қоғамдық қабылдау бөлмесіне түседі, жауап онлайн режімде келеді.
QR код университетте әзірленген Smart.ENU. қосымшасына бекітілген. Осылайша, ЕҰУ-да цифрлық экожүйе белсенді қалыптасуда.
Ғылым және жоғары білім министрі Саясат Нұрбек атап өткендей, бүгінде еліміздің жоғары оқу орындарында қоғамдық қабылдаулар құрылып жатыр. Бұл ректоратқа оқытушылардың, студенттердің, сондай-ақ бей-жай қарамайтын азаматтардың барлық мәселе, ұсыныс және идеяларын бақылауға мүмкіндік береді.
«Университет миссияларының бірі – жергілікті қоғаммен жұмыс істеу. Университеттің ғылыми, білім беру, тәрбиелік міндеттерінен басқа, зерттеу орталығы ретінде қызмет ету, аймақтың экономикалық және әлеуметтік дамуына үлес қосу үшін ерекше миссиясы бар. Жоғары оқу орындарының әкімшілігіне тиімді кері байланыс арналарын беру қажет. Барлық ұсыныс, мәселе уақтылы шешілуі үшін «Халыққа қызмет көрсету орталықтары» тәрізді орындар қажет. Біз бұл проблемалардың қоғамдық қабылдау бөлмелерінде қалмай, тапсырмаға айналып, тиімді шешімін табудың алгоритмдерін пысықтап жатырмыз», деді С.Нұрбек.
ЕҰУ басқарма төрағасы – ректоры Ерлан Сыдықов өз кезегінде қоғамдық қабылдау бөлмесінің негізгі міндеті – өзекті мәселелерді шешу, университет қызметін жақсартуға қатысты студенттерден, оқытушылардан және қызметкерлерден кері байланыс алу екенін атап өтті.
«Басты мақсат – білім алушыларды, қызметкерлерді, ата-аналарды алаңдататын мәселелерді жылдам шешу, университетті дамытуда олардың пікірін, идеяларын және ұсыныстарын ескеру. Мемлекет басшысы «тыңдайтын мемлекет» тұжырымдамасы аясында қоғаммен «байланыс көпірін» нығайту қажеттігіне баса назар аударды. Бұл бағытта жаңа форматтағы қоғамдық қабылдауды ашуды ұйғардық. Соның нәтижесінде, қоғаммен өзара байланыстың тиімді және көпшілікке ыңғайлы жолдарын дамытуға тырысамыз», деді ректор.
Қоғамдық қабылдау бөлмесіне студенттер де, университет қызметкерлері де университеттің жұмысын жақсарту бойынша өз ұсыныстарымен жүгіне алады. Бекітілген кесте бойынша офлайн қабылдауды ЖОО басшылығы жүргізеді. ЕҰУ қоғамдық қабылдау бөлмесінің ашылуында Ғылым және жоғары білім министрі Саясат Нұрбек қоғамдық қабылдау бөлмелері ашылған еліміздің жоғары оқу орындарымен бейнеконференцбайланыс өткізді.
