Қазір мектеп бағдарламасымен шектелуге әсте болмайтынын әлемдік тәжірибе көрсетіп отыр. Білім беру үдерісінде ғылымның соңғы жаңалықтарын кеңінен пайдалану, сол арқылы жас зияткерлердің ынтасын ояту озық ойлы педагогтерге зор жауапкершілік жүктейді. Елімізде мұғалімдер мен оқушыларға арналған «Қызықты ғылым» жобасының ауқымы кеңейіп келеді. Соның бірі Алматы қаласындағы «Өрлеу» біліктілікті арттыру ұлттық орталығында жалғасын тапты.
Алматы қаласының білікті мұғалімдерін бір алаңда жинаған арнаулы семинарда 134 жылдық тарихы бар, география, жаратылыстану ғылымдарынан бастап, ғарышты игеруге дейінгі салаларда көпжылдық халықаралық ғылыми-зерттеулер мен фото-бейне деректердің бай қорын қалыптастырған National Geographic журналының ресурстарын тиімді қолдану әдістері таныстырылды. Тың бастаманың тиімділігін қатысқан мұғалімдер де атап көрсетуде. Алматы қаласындағы №41 жалпы орта мектебінің биология пәнінен сабақ беретін Зәуре Өскенбай семинар барысында мол мағлұмат ала отырып, балаларды жаратылыстану ғылымына қызықтырудың тың тетіктерін игергенін айтады.
«География мен биология пәні мұғалімдеріне арнайы өткізілген семинар барысында біздің саламызға тікелей қатысы бар, әлемдік деңгейдегі National Geographic журналының ғылыми-танымдық онлайн ресурстарымен танысып, оларды сабақ барысында қалай тиімді қолдануға болатынын білдік. Биология пәні бойынша оқушыларды олимпиадаға қалай дайындау қажеттігі жөнінде бағыт-бағдар алдым. Өз басым, пән мұғалімі ретінде журналды сабақта қолдану арқылы оқушының ғылымға деген көзқарасын өзгертіп, қызықтыруға болатынына көз жеткіздім», дейді З.Өскенбай.
Журнал авторлары мектеп мұғалімдеріне арнайы тақырыптық семинарлар өткізу арқылы әлемдік ғылыми-ресурстарды сабақ барысында қалай қолданып, оқушыларды қалай қызықтыруға болатынын, бұл бағыттағы тәжірибені талапкерлердің ғылыми жобаларына дұрыс пайдалану тетіктерін жан-жақты түсіндіріп келеді. Өйткені бұл ресурстардағы еңбектердің бәрі ғылыми тұрғыдан расталып, дәлелденген, авторлық құқығы қорғалған зияткерлік меншік нысаны. Ал ғылымның әліппесі өзіңе дейінгілердің еңбегін оқып-біліп, керегіңе жаратудан басталатыны белгілі.
– Ғылыми сауатты адам ғылымды «шексіз шекара» ретінде таниды. Жаһандық экономикаға негізінен ғылым мен технологияның жетістіктері әсер ететінін мойындайды. Дәлелді насихаттан, деректі көркем әдебиеттен, мағынаны бос сөзден, білімді пікірден ажырата алады. Сабақ барысында журналдың материалдарын мәтін түрінде яки бейне түрінде пайдалана отырып ұстаздар талапкерлердің қызығушылығын арттыра алады. Мұғалімдерді журналымыздың білім саласындағы тегін онлайн платформасымен таныстыра отырып, материалдарды сабақ барысында қалай қолдануға болатыны жайлы бағдар бердік. Алдағы уақытта оқушылар аудиториясын қамтуды да көздеп отырмыз, – дейді «National Geographic» журналының өкілі Қанат Нұралыұлы.
Мемлекет басшысы Қасым-Жомарт Тоқаевтың тапсырмасымен жүзеге асырылып жатқан «Оқуға құштар мектеп» бастамасын қолдау мақсатында жүзеге асырылған жобаны «Шеврон» компаниясының қолдауымен «Kazmedia Holding» жүзеге асыруда. Алып компанияның атсалысуымен жыл соңына дейін Батыс Қазақстан облысының және Астана, Алматы қалаларының мектептеріне журнал топтамалары тегін тапсырылады.
«География, биология, физика, химия, жаратылыстану пәндерінің мұғалімдері үшін бұл жобаның мүмкіндіктері мол. Олар тек оқу құралдарындағы мағлұматтармен шектелмей, танымдық ізденістерден туған мақалалар мен зерттеу жұмыстарын қалаған тілінде пайдалана алады. Кейбір аудиторияда жасауға болмайтын лабораториялық жұмыстарды виртуалды іске асырудың оңтайлы жолдарын да мамандар көрсетіп беріп отыр. Әлемде қандай өзгерістер болып жатыр, ол жаңалықтарды өз пәніне мұғалімдер қалай енгізе алады, соның бәрі кездесу барысында қамтылды», дейді «Өрлеу» БАҰО» АҚ филиалы Алматы қаласы бойынша Кәсіби даму институты директорының орынбасары Қайсар Нұрлыбаев.
Журналдың түрлі түсті бояуға қанық таңғажайып фотосуреттері мен қызықты мақалалары оқырмандарға үйден шықпай-ақ, аптап ыстық Африкадан, солтүстіктегі мұз басқан Арктикаға дейін қайталанбас сапар сыйлайды. Адамзат өркениетінің өзекті мәселелерінен бастап көне тарихына дейін барлап, тұмса табиғат, география, археология, тарих, биология, астрономия секілді ғылым салаларын кеңінен қамтыған басылым ел мұғалімдерін сабақ берудегі заманауи ресурстармен таныстыру ісін жалғастыра бермек.
АЛМАТЫ
