Өкінішке қарай, әу баста келешегі зор көрінген мектеп жыл өтпей көлденең кедергілерге ұшырап, қиын жағдайға душар болып отыр.
– Осы жылы ақпан айынан бастап біз жаттығып жүрген жертөлені бірнеше рет су басып, садақ-жебелеріміз, нысана ілетін тақталарымыз су болып қалды. Содан кейін ол ғимараттан көшуге тура келді. Қостанайда коммерциялық ғимараттарды жалдау ақысы өте қымбат. Мысалы, қалада бос тұрған қойма ғимараттарының бір шаршы метрінің құны 2 500 теңгеден басталады. Садақ тарту үшін ауданы кем дегенде 200 шаршы метр болатын ғимарат керек, яғни ғимарат жалдауға ай сайын 500 мың теңге қажет. Осылайша, тығырыққа тіреліп отырмыз, – дейді Аяулым.
Спорт үйірмесіне қатысып жүрген балалар қыркүйекке дейін «Наурыз» шағын ауданындағы жертөледе жаттығып келген. Қолайсыз ғимараттан біржола көшкен соң, жаттығу өткізетін орын таппай қиналған Аяулым Аппазоваға қала имамы көмек қолын созып, мешіт жанынан салынып жатқан құрылысы бітпеген қатымхана ғимаратын уақытша пайдалануға рұқсат етіпті.
Қазір садақ ату мектебінің 20 шақты шәкірті осы жерде жаттығып жүр. Жылу жүйесі жоқ ғимараттың іші тастай суық.
Ақылы мектепке барып жүрген балалардың әрқайсысы бертінге дейін айына 10 мың теңге төлеп келген. Алайда таяуда үйірме ақысы 15 мың теңгеге дейін өсіпті. Өйткені шәкірттерден жиналған қаржы ғимарат жалдау мен қажет бұйымдарды сатып алуға әзер жетеді. Мысалы, қазір бір нысананың өзі 15 мың теңге тұрады, оның өзі екі аптадан кейін шұрық-шұрық тесіліп, жарамсыз болып қалады екен.
Садақ ату мектебіне мемлекет немесе демеушілер тарапынан ешқандай қолдау көрсетілмейді. Ұйымдастыру жұмыстарының бәрін жаттықтырушы өзі шешеді. Таяуда мектеп шәкірттері жылы ғимаратқа көшеді екен деген жылы хабар естідік.
– Биыл біраз қиындықты бастан кешірдік. Десе де соған қарамастан көп іс тындырдық. Осы уақыт аралығында шәкірттерім садақ тарту өнерінің қыр-сырын меңгеріп, нысанаға дәл тигізуді үйреніп қана қоймай, алдына нақты мақсат қоя білетін, өзіне-өзі сенетін дербес адам ретінде қалыптасып үлгерді. Осының бәрі бізге үлкен күш берді. Қазіргі заманда алдыңды болжау қиын ғой, бірақ мен осы мектептің жабылып қалмауы жолында бар күш-жігерімді жұмсауға дайынмын, – дейді жаттықтырушы.
Қостанай облысы
