Кітапта кейіпкердің жолдастарымен бірге студенттік жатақханаларды аралап, жастарды қалай алаңға шығуға үгіттегені жазылған. Түрлі ұрандарымен азаматтық ұстанымын ашық жеткізген қайсар азаматтың түрменің кермек дәмін татқаны жайлы да сыр шертіледі. Бұған қоса автор Желтоқсан көтерілісіне қатысты мағлұматтарды да нақты деректермен келтіреді. Осылайша, қаламгер тәуелсіздікке ұмтылған қазақ баласының болмысын ашу арқылы көтерілістің беймәлім қырларын баяндайды.
– Автор Болатбек Төлепберген – Желтоқсан көтерілісін зерттеп жүрген азаматтардың бірі. Кітап – әдеби шығарма емес, архивтегі құжаттарға, тәуелсіздікке тегеурін берген сол күндер туралы фактілерге сүйеніп жазылған хроникалық детективтік шығарма. Жалпы, Желтоқсан көтерілісі ұлттық сана оянғанының көрінісі болды. Біздің алаңға шыққандағы себеп, әрине, Д.А.Қонаевтың хатшылықтан түсіп қалуы. Дегенмен арғы жағында дініміз бен ділімізге қауіп төніп, ана тілімізде көшеде сөйлесуге ұялатындай жағдай кешкеніміз де әсер етті. Сондықтан ұйымдастыру жағын 4-5 студент түнімен институттарды аралап, үгіт-насихат жүргізгеніміз, олардың ерттеулі тұрған аттарына тек мінгізіп қана кеттік. Оған өздері дайын болды, – дейді Құрманғазы Айтмұрзаев.
Кітап жалпы тарихшыларға, репрессия тақырыбына, Желтоқсан көтерілісіне қызығушылық танытқан барша оқырманға, жастарға, жоғары оқу орындарының студенттеріне арналған. Автор тарихи ақтаңдақтар мәселесін бүгінгі көзқарас тұрғысынан жіті саралап, жете зерттеген. Кейіпкердің тағдыр талайы мен тағылымынан жұртшылыққа, әсіресе жастарға алар тәлім жетерлік.
Мың дана таралыммен жарық көрген кітап үш тараудан тұрады. Бірінші тарауда «Азаттық аңсаған» деректі хикаяты, екінші тарауда кітап кейіпкері туралы «Серке» деректі фильмінің сценарийі, ал үшінші тарауда автордың «Желтоқсан қаhарманы» Құрманғазы Айтмұрзаевты насихаттау барысындағы шаралардың материалдары берілген. Жалпы, кітаптың жарық көруіне демеушілік көрсеткен кәсіпкер, белгілі меценат, Желтоқсан көтерілісіне қатысушы қаhарманның бірі, кітап кейіпкерінің досы Нұрлан Есқалиев. Айта кетейік, Қазақстан Республикасының Ұлттық академиялық кітапханасында ұйымдастырылған іс-шараға Желтоқсан көтерілісі туралы халықаралық деңгейде жиын өткізген Сабыр Қасымов, Елтаңба авторының бірі Жандарбек Мәлібеков, зиялы қауым өкілдері, желтоқсаншылар мен мектеп оқушылары қатысты.
Зейін ЕРҒАЛИ,
«Egemen Qazaqstan»