27 жастағы Нидерланд өкілі Кейс Бол алдағы бір маусым «Астана» сапында жарыстарға қатысатын болды. Ол бұған дейін өз елінде іргетасы қаланған Team DSM командасының намысын қорғап, спринтерлер бәсекесінде және жекелей кезеңдерде бірталай елеулі табысқа қол жеткізген. Атап айтар болсақ, кейінгі төрт жылдың ішінде Кейс бір күндік «Нокере Корс», «Калифорния туры» және «Норвегия турында» топ жарған болса, 2020 жылы «Вольта Альгарве», 2021 жылғы «Париж-Ницца» және 2022 жылғы «Британия туры» кезеңдерінде мәреге бірінші жеткен.
Осының алдында Лондон Олимпиадасының чемпионы Александр Винокуров жетекшілік ететін «Астана» велокомандасы Ұлыбританияның даңқты велошабандозы, әлемдегі ең үздік спринтерлердің бірі Марк Кавендишпен де бір жылдық келісімшарт жасасқан болатын.
