Шешімін күткен мәселе көп

«Оңтүстік өңірдегі шаруалар көктемгі егіс науқанына дайындық жұмысын бастап кетті. Жақын арада өзге аймақтар да іске кіріседі. Бұл ретте, олардың тұқым, жанар-жағармай, техниканы жөндеуге қажет қосалқы бөлшектер сатып алуы үшін тиісті қаражаты болғаны маңызды. Сондықтан пайда болған мәсе­ле­лерді уақтылы талқылап, оларды Үкімет деңгейінде көтеру қа­жет», деді комитет төрағасы Қайнар Абасов.

Шаруалардың айтуынша, ауыл шаруашылығы саласында ұйымдастырушылық және заңнамалық деңгейдегі мәселелер жетіп-артылады. Мәселен, Батыс Қазақстан облысындағы шаруа қожалығының басшысы Сержан Идиатов майлы дақылдар экспортына квота және лицензия енгізу жоспарланып отырғанына қынжылды.

«Бұл шешім мүлдем дұрыс емес. Егіншіліктің бұл түрі өңір шаруалары үшін негізгі та­быс көзі саналады. Біз тиісті орган­дарға Батыс Қазақстан облы­сын­дағы шаруалардың атынан ұжымдық хат жолдадық. Осы мәселені Үкімет деңгейінде көтеруді сұраймыз», деді ол.

Ал Қостанай облысындағы Андрей Двуреченский есімді кәсіпкер несиелеуге арналған кепілдік базасы мәселесін көтерді. «Бәрінде бірдей кепілге қоюға болатын мүлік жоқ. Мысалы, 150 миллион теңге несие алу үшін 360 миллион теңгенің кепілі қажет. Бұл айтарлықтай қиындық туғызады. Сонымен қатар қазір бәрі қымбаттап жатыр. Шаруалардың шығыны артып барады. Сондықтан биыл қажетті қаржыландыру көлеміне қол жеткізе алмау қаупі бар. Егер мұның шешімі қазір табылмаса, өңірдің ауыл шаруашылығында қаржы тапшылығы туындауы мүмкін», деді ол.

Ал Маңғыстау облысының комитет мүшесі Оңайбек Әбділов су тапшылығы бар өңірде құдық қазуға берілетін субсидияны алып тастау көзделіп отырғанын атап өтті. Оның айтуынша, бұл әрекет былтыр қиын кезеңді бастан өткерген аймақтың агросекторына одан әрі зиян кел­тіруі мүмкін. Сондай-ақ ол маң­ғыстаулық шаруаларды күн па­нельдерімен қамтамасыз ету жұ­мысын қайта жаңғырту қажет екенін атап өтті.

«Мәселенің көбісі қазіргі эко­номикалық жағдайға байла­нысты туындап жатқанын тү­сініп отырмыз. Инфляция мен қымбатшылықтан ең алдымен шаруалар зардап шегеді. Сондықтан көтерілген мәсе­ле­лердің ешқай­сы­сы назардан тыс қалмайды. Келесі оты­рыс­қа жауапты ведом­ство­лар­дың өкілдерін шақыру қажет. Мәселен, «Қазақстан темір жолы» компаниясының өкілін және тағы басқаларды шақырған жөн», деп қорытындылады Қайнар Абасов.