Президент өз сөзінде білім сапасын, әсіресе орта білімнің деңгейін арттыру үшін батыл шешім қабылдау қажет екенін айта келіп: «Маған кейбір тәжірибелі ұстаздар тиісті министрлік дайындаған тапсырмалар тым күрделі деп шағымданды. Бәлкім, оны жеңілдету, жетілдіру керек шығар. Бұл салада қатып қалған қатаң ереже болмауы керек. Бірақ негізі ұстаздарға қойылатын талап жоғары болуға тиіс», деді.
Шынында да мұғалімдердің біліктілік емтиханында артық талаптар бар екені рас. Оны ұзатпай реттесе болады. Алайда білім сапасы тікелей ұстазға байланысты екені анық. Біз білімді ұрпақ даярлап шығару үшін мұғалімдердің білімділігіне, біліктілігіне, іскерлігіне баса назар аудару қажет. Мәселен, мектептерді заманауи құрал-жабдықпен жарақтап, материалдық-техникалық базасын қанша нығайтқанымен, оқушының сапалы білім алуы ұстаздың қолында. Сондай-ақ оқытушының бойында біліктілігімен бірге, ұстаздық қасиеті де болуы қажет. Егер ол өте білікті болғанымен жаңағы қасиет бойынан табылмаса, оқушыға өз дәрежесінде білім бере алмайды. Сондықтан осы қасиетті қатар ұстанған ұстаздың жұлдызы жарық.
Сонымен бірге Мемлекет басшысы мұғалім тапшылығын желеу етіп, мектепке кез келген адамды жұмысқа ала беруге болмайтынын айта келіп, мұғалім даярлау ісін жетілдіру үшін нақты шаралар қабылдау қажет екеніне маңыз берді. «Бізде Президенттік жастар кадр резерві бар. Дәл сол сияқты білім саласына өзгеріс әкелетін 1 мың маман арнайы дайындықтан өтетін болады. Осыған орай тиісті бағдарлама қабылданады.Кадр мәселесі жоғары білім беру жүйесі үшін де өте өзекті», деді Президент.
Жиында көтерілген кадр мәселесі де көңілімнен шықты. Өз тәжірибемнен бір мысал келтірейін. Еңбек жолымды математика пәні мұғалімі болып бастап, одан соң мектеп директорының тәрбие ісі жөніндегі орынбасары, сосын оқу ісі жөніндегі орынбасары болдым. Сосын мектеп директорлығына тағайындалдым. Осындай баспалдақтан өткен маманның тәжірибесі молайып, ісі алға басады. Бұрын мектеп директорлары арнайы курста оқып, білікті мамандардың дәрісін тыңдайтын. Онда мектептегі оқу үдерісі, тәрбие жұмысы, бәрі айтылады. Заңнама құжаттарымен де таныстырады. Мектеп директоры болу оңай емес. Үлкен жауапкершілікті жүктейді.
Ел Президенті Қасым-Жомарт Тоқаевтың VIII сайланған Парламенттің алғашқы сессиясында сөйлеген сөзі депутаттарға өз міндеттерін сапалы орындауға жол сілтеген нұсқау болды деп есептеймін.
Аягүл МИРАЗОВА,
Қазақстанның Еңбек Ері