Суретті түсірген Ерлан ОМАР, «EQ»
Себебі «қалаларымыздың жағдайы мәз емес» деген сөз, «әкімдер өз жұмысын дұрыс жасап жатқан жоқ» дегенді білдіреді. Мемлекет басшысы өз сөзінде ірі шаһарлардың инфрақұрылымы жылдан-жылға артып келе жатқан сұранысқа жауап бере алмай отырғанын да өткір сынға алды. Шығыс Еуропадағы Балқан қалаларының муниципалды қызметін мысалға келтірген Президент: «Олардың бюджеті әлдеқайда аз, ал қалалары өте таза», деді.
Екінші, Президент «Семей қаласындағы балалар алаңында ойнаудың өзі өмірге қауіпті» деген сөзі тікелей аймақ басшысына бағытталған жоқ. Рас, Семейдің мәселесі бастан асып жатыр, десе де басқа қалалардың да «тосын сыйлары» жоқ емес. Президент бұл сөзімен «мен барлығын біліп отырмын» деген мессендж жіберді. Осы ескертуден-ақ әкімдер нақты нәтиже шығару керек. Нәтиже болмаса, «Платон менің досым, бірақ шындық қымбат» дегенге келе жатыр.
Үшінші, Президенттің «Халық өз қаласына ие болу керек. Тазалықты сақтау әр қала тұрғындарының қолында» деген сөзінің артында идеология бағытындағы жұмысты арттыру, әсіресе жастар тәртібіне көңіл бөлу мәселесі жатыр. Бұл тарапта Оқу-ағарту министрлігіне жүктелер жауапкершілік салмақты. Бізге жас буынның тәлім-тәрбиесін, мәдениетін тереңдете түсу қажет.
Төртінші, Мемлекет басшысының «Әкімдер өзі басқаратын қалалар мен елді мекендерді жаяу аралауға тиіс» деген сөзінің айналасында біраз әңгіме басталып кетті. Көпшілік бұл сөзді тікелей түсінеді. «Әкімдер – мемлекеттің жергілікті жердегі өкілі». Сондықтан олар аймақтағы жағдайды, мәселе мен шешімін күткен түйіндерді іштен білгені жөн. Жаяу жүріп қаланың кемшілігін байқап, жолшыбай халықпен кездесу де көп түйінді тарқатуға септігін тигізеді. Көлікпен барып, көлікпен қайтып, орынбасарларының «бәрі жақсы» деген есебіне тоқмейілсу дұрыс емес. Әр мәселені көзбен көргенге жетпейді.
Бесінші, Президенттің ауылшаруашылық мәселесіне қатысты тігісін жатқыза айтқан: «Ауыл шаруашылығы және өндіріс саласының дамуында нақты нәтиже жоқ» деген сөзі – ауыр сын. Күнделікті азық-түлігін ала алмай, қымбатшылықтан еңсесін көтере алмай отырған елдің мәселесін Мемлекет басшысы біліп отыр.
Алтыншы, су мәселесі де бірінші рет айтылып отырған жоқ. Бірақ Үкімет, әсіресе ауыз су проблемасына селқос қарайтындай көрінеді. «2050 жылы суы тапшы ел боламыз» деген қатаң ескерту айтылды. Бұл сөз болашақ ұрпақтың қамын қазірден ойлау қажеттігін білдіреді.
Президент кеңесте депутаттарды сайлаушылардың өзекті мәселелері бойынша күнделікті қажырлы жұмысқа кірісуге шақырды. Бұл ретте кәсібилік пен жауапкершілік танытуға тиіс екендіктерін де еске салып өтті. «Депутаттар әкімдіктермен өзара іс-қимыл атқарушы органдар қабылдайтын шешімдердің ашықтығын қамтамасыз ете отырып, сындарлы арнада жүргізілуге тиіс», деді Мемлекет басшысы. Рас, халық немқұрайлық пен жалқаулықты кешірмейді. Халық мүддесіне келгенде «бармақ басты, көз қыстыға» жол бермеу керек. Президенттің осы сөзінен кейін депутаттар арасында еңбекқорлық бәсекелестігі пайда болатынына сенімдімін.
Самат НҰРТАЗА,
Мәжіліс депутаты