Мектеп-интернат 1948 жылдың қыркүйегінде құрылған. Қазақтың бұлбұлы Күләш Байсейітованың есімін есте сақтау мақсатында білім ордасына 1957 жылы әйгілі әншінің есімі берілді. Талай таланттың томағасын сыпырған мектеп-интернатта қазір 480 оқушы білім алады. Заманауи материалдық-техникалық база отандық әрі шетелдік ұжымдармен шығармашылық байланыстар орнатуға жол ашып отыр. Мәселен, инновациялық компьютерлік технологиялар гармония, сольфеджио, музыка әдебиеті сияқты пәндерді оқыту кезінде қолданылады.
– 1996 жылы еліміздің түкпір-түкпіріндегі талантты балаларға жан-жақты білім мен тәрбиеге қажетті жағдай жасалып, кәсіби даярлығын одан әрі әлемнің үздік жоғары оқу орындарында жалғастыруға мүмкіндік беру үшін мектеп республикалық мәртебеге ие болды. Бұл ретте оқу ордасында басқа қаладан келген балаларға арналған 110 орындық интернат бар. Мұндағы жатын орындар мен бөлмелер тиісті талаптарға, санитарлық нормаларға сай жоғары эстетикалық деңгейде безендірілген. Тұрмысқа да жақсы жағдай жасалған, – дейді мекеме басшысы Бақтияр Әбдірашев.
Оның айтуынша, мектептегі музыка пәндерінің білім диапазоны әртүрлі болып келеді, әрі оқушыларды кәсіби-әдістемелік қажеттіліктерін қамтамасыз етеді. Мектептегі білім келесі арнайы мамандықтар бойынша жүргізіледі: арнайы фортепиано, ішекті аспаптар, үрмелі және ұрмалы аспаптар, халық аспаптары, музыка теориясы және композициясы, хорды дирижирлеу. Оқушылардың кәсіби дағдысын, орындаушылық және сахналық шеберліктерін дамыту үшін шығармашыл ұжымдар, яғни симфониялық, камералық, халық аспаптар, үрмелі, эстрада-симфониялық оркестр, хор, скрипкашылар, домбырашылар, виолончелистер, қобызшылар және қылқобызшылар ансамбльдері ұйымдастырылған. Барлық бөлімде білікті мамандар еңбек етеді. Олардың қатарында халық әртістері, еңбек сіңірген өнер қайраткерлері, Құрманғазы атындағы Қазақ ұлттық консерваториясының профессорлары мен доценттері, халықаралық және республикалық конкурстардың лауреаттары, білім және мәдениет саласының үздіктері бар. Ұжымда көп жылдан бері көпшілікке белгілі, музыкалық қоғамдастық мойындаған «Байсейітова мектебінің» дәстүрі, оқыту мен тәрбиелеудің бірізділігі қалыптасқан. Оқытушылардың 80 пайызы – мектептің түлектері.
– Ғалымдар дәлелдегендей, музыкамен айналысқан адамдардың миында ерекше нейрондар пайда болып, ойлау қабілетіне оң әсер етеді. Сондықтан қатаң таңдау мен сұрыптаудан өткен дарынды балалар осындай арнайы мамандандырылған мектепте оқып, тұлға болып қалыптасатыны анық. Мұндай мектепте оқу – мақтаныш әрі үлкен жауапкершілік. Себебі оқушыларымыз екі мектепті қатар игеріп, ертеден кешке дейін оқудан бас алмайды. Сабаққа қатысуымен қатар жеке дайындығы да өте көп уақытты алады. Сол себепті оқу ордасын толық аяқтаған түлектеріміздің бойында ұқыптылық, тұрақтылық және табандылық секілді жақсы қасиеттер мықтап орнығады. Керісінше жағдайда ондай тұлғадан жақсы орындаушы, музыкант шығуы екіталай, – дейді мектеп-интернаттың директоры.
Білім ордасы бүгінге дейін қилы-қилы кезеңдерді де бастан өткерді. «Қандай кезең болса да, мектебіміз әуелгі бағытынан ауытқымады. Осы орайда қиындықтарды еңсеріп, мектептің тұтастығын сақтаған, дамуына ерекше үлес қосқан бұрынғы директор Охан Абдуллаевтың еңбегін атап өткім келеді. Бүгінде мектебіміз биіктен түспей, кәсіби мамандарды даярлау ісін жалғастырып келеді. Түлектеріміздің елді айтпағанда, шетелдің атақты оқу орындарына оқуға түсуі – біздің басты жетістігіміздің бірі. Олар театр, кино секілді салаларда жемісті еңбек етіп жүр. Айталық, Жәмила Серкебаева, Әли Оқапов, Айдос Сағатов, Карина Абдуллина секілді эстрада жұлдыздары біздің мектепте оқыған», деді ол.
Жаңабек ТОЙБАЗАРОВ,
журналист
АЛМАТЫ