Бұл – бірде-бір легионерсіз, тек жергілікті хоккейшілерден құралған Қазақстан ұлттық құрамасының биылғы әлем чемпионатындағы төртінші кездесуі және қатарынан үшінші ойындағы жеңілісі. Мұның алдында біздің жігіттер Чехия құрамасына 5:1, Швейцария хоккейшілеріне 5:0 есебімен есе жіберген болатын. Тек алғашқы турда ғана Норвегия ойыншыларын буллит сериясында тізе бүктіріп (4:3), биылғы дүниежүзілік доданың шағын сенсациясын тіркеген еді.
Алайда кейінгі ойындарда Ғалым Мәмбеталиев шәкірттері қатарынан екі турда азулы қарсыластарынан ірі есеппен жеңілсе де, бас бапкер бұрынғыдай мұзайдындағы барлық ойыншыға сенім білдірді. Тек Канадамен өткен ойында жаңа қақпашыны сынап көруге бел буып, алғашқы үш турда 13 шайба өткізіп алған Андрей Шутовтың орнына бірінші минуттан бастап Никита Бояркинді шығарды. Дегенмен «Барыстың» қақпашысы бұл матчта өз қақпасына бес шайба өткізіп алды.
Үйеңкі жапырақтар елінің өкілдері ә дегеннен матчты белсенді бастап, ойындағы алғашқы шабуылын голға айналдырды. Кездесудің 19-секундында Маккензи Уигар алыстан дәл соққы жасап, Бояркинді қапы қалдырды. Арада бес минут өткенде Лоусон Крауз екі мәрте мергендік танытып, Канада құрамасына айқын басымдық сыйлады – 3:0. Бірінші кезеңнің 10-минутында Қазақстан құрамасы сапынан қорғаушы Әділ Бекетаев гол соғып, есеп айырмасын қысқартқан еді, бірақ кезең соңына дейін канадалықтар есепті 4:1-ге жеткізді. Шайбаның авторы – Джо Велено.
Үзілістен кейін біздің хоккейшілер қорғаныста да, шабуылда да қарсыластарының атақ-даңқынан қаймықпай, сенімді ойнай бастаған-ды. Бірнеше рет қарсылас қақпасының маңайында қауіпті шабуыл ұйымдастырып, канадалық қорғаушыларды біраз әбігерге салды. Бірақ жерлестеріміз өз дегеніне жете алмады. Үшінші кезеңде Солтүстік Америка құрлығының өкілдері тағы бір шайба соғып, ойынның нүктесін қойды – 5:1. Бұл жолы Самуэль Блэйз өз атын таблоға жаздыртты.
Біздің жігіттер әлем чемпионатындағы келесі ойынын бүгін турнир кестесінде бесінші орында тұрған Словакия хоккейшілерімен өткізеді.
