«Бүгінде облыста 12 апатты және 9 үш ауысымды мектеп бар. 2023 жылы 27 мектептің құрылысы басталады, оның ішінде 9 мектеп «Жайлы мектеп» ұлттық пилоттық жобасы аясында салынады. Жыл соңына дейін 18 мектепті пайдалануға беруді жоспарлап отырмыз», деді облыс әкімі Нариман Төреғалиев Орталық коммуникациялар қызметінде өткен жиында.
Ол мектеп оқушыларын тасымалдау үшін 54 автобус сатып алынғанын атап өтті. Облыс аумағында 9 спорт кешені пайдалануға берілді, төртеуі салынып жатыр. Тағы бір кешен құрылысын 2024 жылы бастау жоспарланып отыр. Биыл М.Өтемісов атындағы Батыс Қазақстан университетінің студенттеріне арналған 500 орындық жатақхана құрылысы аяқталады.
«Облыста 3 пен 6 жас аралығындағы балаларды мектепке дейінгі тәрбиемен қамтамасыз ету 100 пайызды құрады. Бүгінгі таңда 1 жастан 6 жасқа дейінгі балаларды балабақшамен қамту 84,3 пайызды құрайды. Бұл көрсеткішті 2025 жылға қарай 100 пайызға жеткізу жаспарланды», деп қосты спикер.
