Суретті түсірген – Тамара Дәулетбаева
Алматы облысына қарасты Талғар ауданының Панфилов ауылында қапыда қаза тапқан шекарашылардың есімін ұрпақ жадында жаңғыртуға арналған тағылымды іс-шара өтті. Шекара қызметінің директоры болған Тұрғанбек Стамбековтің есімі көшеге беріліп, аллея ашылды. Алаңқайдың кіре берісіндегі 27 әскери қызметшінің есімі қашап жазылған мемориалды тақта олардың ел жүрегіндегі екінші өмірі басталғанын айшықтап тұр.
Тағзым іс-шарасының шымылдығын ашқан генерал-майор Тоқтасын Бұзыбаев жұлдызы енді жарқырап келе жатқан шағында ағып түскен Т.Стамбеков туралы әсерлі естелік айтып, іс-шараның өтуіне мұрындық болған жақындарына алғыс білдірді.
– Сардар шекарашылардың білім ұстаханасында басшылық қызмет атқарды. Тәжік-ауған шекарасын кірпік қақпай күзеткен батальонның командирі болды. Еліміздің шығыстағы, оңтүстіктегі өңірлік басқармаларын басқарып, мемлекеттік шекара бұзушылар мен контрабандашылармен ымырасыз күрескенін онымен бірге қоян-қолтық қызмет атқарған аға буын шекарашылар жақсы біледі. 2012 жылдың маусымында Президент Жарлығымен Шекара қызметі директорының міндетін уақытша атқарушы болып тағайындалған Т.Стамбеков өзінің күш-жігерін «Қазақстан Республикасының Мемлекеттік шекарасы туралы» жаңа заң жобасын әзірлеуге бағыттады. 2013 жылдың 15 қаңтарында заң күшіне енді. Қазіргі заманның талаптарын ескере отырып, ведомство басшысы шекара қызметінің түбегейлі реформасын жүзеге асыруды көздеді. Бұл, ең алдымен, мерзімді сарбаздарды келісімшарттың әскери қызметшілері контингентімен алмастыруға, жаңа үлгідегі әскери қалашықтар салу секілді ауқымды шараларға қатысты болды, – деп атап өтті Т.Бұзыбаев.
Тұрғанбек Мұхаметқалиұлы 1961 жылы Алматы облысында дүниеге келген. Алматыдағы жоғары шекара командалық училищесін 1983 жылы бітіріп, алғашқы кәсіптік еңбек жолын қазіргі Панфилов ауданы бойынша шекара басқармасының алыстағы шекара бөлімшелерінің бірінде бастады. Осы кезеңнен табанды, талапты офицер ретінде танылып, қолынан қаруын тастамай, еліміздің шекарасын кірпік қақпай күзетті. Полковник шенін мерзімінен бұрын алған шекарашы офицер ІІ дәрежелі «Айбын» орденімен, 25 үкіметтік наградамен марапатталды, «Құрметті шекарашы» атанды. Президент Жарлығымен, полковник Т.Стамбековке (қаза болғаннан кейін)
І дәрежелі «Айбын» ордені берілді.
Іс-шарада Тұрғанбек Мұхаметқалиұлының бауыры Гүлнар Стамбекова, ҰҚК Шекара қызметі Алматы облысы бойынша департаментінің бастығы, полковник Әлібек Каюпов бастаған әріптестері айбынды азаматты еске алды.
– Мен Тұрғанбек Мұхаметқалиұлымен екі мыңыншы жылдары Үшарал шекара жасағында қоян-қолтық қызмет атқардым. Шекара қызметіндегі осы бір өте іскер әскери басшы шын мәнінде шекара үшін туған нағыз патриоттың өзі еді. Бұдан кейін тағдыр бізді Шонжы шекара жасағында кездестіріп, ол әскери бөлімнің командирі, мен оның бірінші орынбасары-штаб бастығы болдым. Менің жадымда офицер өзінің жинақы, ширақ жүріс-тұрысымен, мәдениетті, тәрбиелі сөздерімен, нағыз қолбасшыға ғана тән ерекше қасиеттерімен қалды. Ол істің адамы еді. Бойындағы адалдық, өз жұмысына шексіз берілгендік, жас кадрларға қамқорлығы – офицерді басқалардан даралап тұратын, – деді Ә.Каюпов.
Әуе апатынан қаза тапқан әскери қызметшілердің туған-туыстары, шекарашы ардагерлер мен әскери қызметшілер, қаладағы «Жас шекарашы» әскери-патриоттық клубының мүшелері қатысқан рәсім полковник Стамбеков атындағы аллеяға 27 шырша отырғызу шарасымен түйінделді.
Алматы
