Аймақтағы мемлекеттік қызметшілерді қолдау шаралары облыс әкімі Нұрлыбек Нәлібаев пен «Парасат жолы» облыстық слеті аясында Сыр еліне келген Президент жанындағы Мемлекеттік басқару академиясының ректоры Ерлан Әбілдің кездесуінде талқыланды. Аймақ басшысы бұл іс-шараның мемлекеттік қызметшілердің оң имиджін қалыптастыруда, тәжірибе, өзара пікір алмасу алаңына айналдыруда маңызы зор екенін атап өтті.
«Мемлекеттік қызметшілердің біліктілігін арттыру, қызметтік өсуіне жағдай жасау ұдайы назарда. Биыл өңірде 96 мемлекеттік қызметкер қайта даярлаудан өтті, 697-сі біліктілік арттыру курстарында машығын жетілдірді. Өңірлік резервті қалыптастыру үшін құзыреттерді бағалауды жүзеге асыратын ассесмент қызметіне қажетті қаржы қаралып жатыр. Аймақтағы мемлекеттік қызметшілердің Президент жанындағы Мемлекеттік басқару академиясында білім жетілдіруіне, академия түлектерінің ел дамуы жолында еңбек етуіне үнемі қолдау білдіреміз», деді Нұрлыбек Машбекұлы.
Президент жанындағы Мемлекеттік басқару академиясының ректоры облыс әкіміне көрсеткен қолдауы үшін алғыс айтып, алдағы уақытта да тиімді әріптестік орнатуға ниет білдірді. Облыста 3200-ден астам мемлекеттік қызметші түрлі салада еңбек етеді, 35 жасқа дейінгі 471 мемлекеттік қызметшінің жиырмасы – Президент жанындағы Мемлекеттік басқару академиясының, үшеуі «Болашақ» бағдарламасының түлегі. Былтыр облыста 9 мемлекеттік қызметші Президент жанындағы Мемлекеттік басқару академиясы грантын иеленсе, биыл 6 мемлекеттік қызметші академияда жаңа білім дағдыларын меңгеруде.
Қызылорда
