Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Жолдауында «Көліктік-логистикалық әлеуетті толыққанды іске асыру стратегиялық маңызға ие. Қазақстан солтүстік пен оңтүстікті, батыс пен шығысты байланыстыратын жаһандық жолайрықта орналасқан. Бұл біздің елімізге зор мүмкіндік беріп отыр. Сондықтан көлік-логистика саласы экономикамызды алға бастайтын басты күштің біріне айналуға тиіс», деп атап өткен еді. Бұдан біз облысымыздағы «Достық-Мойынты» бағытында ірі теміржол жобаларын жүзеге асырып, Достық шекаралық теміржол бекетінде «құрғақ» порт салудың өзектілігі жоғары екенін аңғарамыз. Бұл тек Жетісудың ғана емес, еліміздің экономикалық белсенділігін көрсетеді.
Міне, осы мақсат шеңберінде Алакөл ауданына қарасты Достық ауылында «Nurzholy Customs Service» халықаралық көлік-логистикалық орталығы ашылды. Бұл – Қазақстан мен Қытай Халық Республикасының ең алғашқы шекараларының бірі. Жобаның көздеген мүддесі қойма шаруашылығы, халықаралық және жергілікті логистика саласында ел нарығында сапалы және бәсекеге қабілетті қызметтерді ілгерілету. Мұны аталған нысанның ашылу рәсіміне арнайы келген Көлік вице-министрі Мақсат Қалиақпаров та айтты.
«Еліміздің көлік-логистикалық әлеуетін арттыруға Мемлекет басшысы ерекше көңіл бөлуде. «Достық-Мойынты» бағытында теміржол құрылысын сапалы аяқтау – бүгінгі күннің басты тақырыбы. Жоба жүзеге асқанда Қазақстан мен Қытай арасындағы тауар тасымалы екі жарым есеге артатын болады. Халықаралық көлік-логистикалық орталықтың еліміздің экономикалық дамуына
тигізер пайдасы ұшан-теңіз. Болашақта Орталық Азия мен Еуропа арасындағы тауарлық алыс-берісті бірнеше есеге арттырамыз деген жоспарымыз бар. Қазіргі таңда жаңадан ашылған әмбебап кешен Қытай мен Қазақстан арасындағы сауда-саттықтың жұмысын жандандырады. Ең бастысы, әрбір істің берекесін халық көруге тиіс. Қазақстанның әлемдік экономикадағы бәсекеге қабілеттілігін арттыруға ықпал ете отырып, өңірлік және халықаралық көлік қатынасында маңызды рөл атқарады деп сенеміз», деді М.Қалиақпаров.
Оның айтуынша, ауқымды жобаға 2,8 млрд теңге инвестиция тартылып, 120 адам тұрақты жұмыспен қамтамасыз етілген. Одан кейін Мемлекеттік кірістер комитетінің төрағасы Жандос Дүйсембиев жобаның жақсы жүзеге асқанын айтып, халықаралық көлік-логистикалық орталықтың жұмысына сәттілік тіледі.
Халықаралық көлік логистикалық орталығының бір ерекшелігі – жеткізу тізбегін жеңілдету және тұтынушының логистикалық шығындарын азайту үшін қойма жұмысы кросс-докинг (автокөліктен автокөлікке артық тиеу) технологиясы арқылы жүзеге асады. Яғни Қытайдан келген жүк отандық автокөліктерге жылдам тиелетін болады. Жобаны еліміздің Қаржы министрлігі мемлекеттік кірістер комитеті «Nurzholy customs service» ЖШС-мен бірлесіп жүзеге асырып отыр.
Кешеннің уақытша сақтау қоймасы аумағында кедендік рәсімдеу орталығын ұйымдастырумен және орналастырумен іске асырады. «Достық» кеден бекетінен өтетін жүк көліктерінің саны тәулігіне 200-ден 600-ге дейін ұлғайтылып, тәуліктік жүк айналымын 4 мыңнан 12 мың тоннаға дейін арттыруға үлкен мүмкіндік береді. Бұл дегеніңіз – бір жыл ішінде жүк айналымын 12 мың тоннадан 3 млн тоннаға дейін арттыруға қауқарлы деген сөз.
Қойма іші заманауи талаптарға сәйкес барлық қажетті әрі сапалы құрал-жабдықтармен жабдықталған. Атап айтсақ, күзет, бейнебақылау камералары, өрт сөндіру жүйелері және т.б әртүрлі тауарды өңдеуге арналған заманауи инфрақұрылымдармен жабдықтары бар.
Шынында, жер бетіндегі халықтың тұтынушылық сұранысы көбейіп, өндіретін өнім көлемі еселеп артқан сайын соншама жүкті тасымалдау мәселесі де күн тәртібінен түскен емес. Адам баласы мыңдаған тонна тауарды бір нүктеден екінші нүктеге жеткізу мақсатында жаңа технологияның соңғы мүмкіндіктерін пайдалануда. Халқы тығыз орналасқан қалалар мен елді мекендер маңайында жолайрықтарымен қоса ірі қоймалар пайда бола бастады. Бұл ретте көлік тасымалы жолдарының ауқымды, кең салалы болуы елдің әлеуметтік-экономикалық әл-ауқатын жақсартуға мүмкіндік берері анық.
Жетісу облысы
