Фото: ДСМ басшысының Facebook парақшасынан
«Кез келген ауа райында, аяз бен боранда, жол жоқ жерде жедел жәрдем бригадалары төтенше жағдайларға қарамастан адамдардың өмірін сақтап қалу қажет миллиондаған шақыртуға қызмет көрсетеді. Осындай батырлардың қатарында – Хромтау ауданының жедел жәрдем фельдшерлері Құдияров Бауыржан Сұлтанханұлы, Тілеу Қайрат Берікұлы, Рысбай Сая Ыбырайқызы бар. Олар қар құрсауына қарамастан жүрек ұстамасымен ауыратын науқасқа жетіп, өздерінің асыл кәсібіне адалдықтары мен күш-жігерлерін танытты. Дәрігерлердің айтуынша, сол жерде кардиограмма жасалып, ұсынымдар берілді, сәтін салғанда пациент емдеуге жатқызуды қажет етпеді», деп жазды А.Әлназарова Facebook парақшасында.
Осы ретте ол Хромтау ауданының жедел жәрдем бригадасы фельдшерлерінің қажырлы еңбегін ерекше атай келе, барлық медицина қызметкерлеріне алғыс білдірді.
Еске салайық, кеше әлеуметтік желіде науқасқа қалың қарды кешіп жеткен жедел жәрдем қызметкерлерінің видеосы тараған еді.
