Бәйдібек ауданында «Менің талым!» атты іс-шарада ауылдық округ әкімі аппаратында жұмыс істейтін кызметкерлер отбасыларымен бірге аудан орталығындағы Т.Рысқұлов көшесінің бойына 100 түп сәнді тал отырғызды. Жалпы, өңірде тазалық бағытында атқарылар жұмыстар бойынша әр аптаның өзіндік атауы мен нақты мақсаттары бар. Яғни «Таза өлке», «Киелі мекен», «Жасыл аймақ», «Өнегелі ұрпақ», «Мөлдір бұлақ» апталықтарында өңір тұрғындарының экологиялық мәдениетті қалыптастыру, қоршаған ортаны тазарту, көгалдандыруға қосар үлесі мол болмақ. Игі істе барлық аудан, қала белсенділік танытып жатыр.
Мысалы, Кентау қаласындағы аллеялар абаттандырылып, орындықтар мен қоқыс жәшіктері тазаланып, сырланды. Жарықшамдар қалпына келтірілді және талдардың түптері ағартылды. С.Сейфуллин көшесіне 5 мың дана раушан гүлі отырғызылды. Бұған қоса көше қиылыстарына, аллеялар мен саябақтарға 20 мың дана раушан гүлі және 40 мың дана біржылдық гүлдер отырғызылмақ. Абай даңғылы бойындағы К.Жұмаділов атындағы аллеяға шырша, қарағаш көшеттері отырғызылды. Облыстық табиғи ресурстар және табиғат пайдалануды реттеу басқармасының тарапынан 8 500 түп қарағаш көшеттері үлестіріліп, «Жасыл аймақ» учаскесіне отырғызылды.
Ал Арыста жалпы ұзындығы 29 шақырым болатын 4 каналға механикалық тазалау жұмыстары жүргізілді. Сауран ауданына қарасты 12 ауылдық округтің ішкі көшелерінің бойы мен іскерлік аумақтарға 25 мың түп қарағаш пен үйеңкі отырғызылды. Сонымен қатар Шорнақ мешітінің 3,5 гектар аумағына 1000 түп жеміс ағашы егілді. Алдағы уақытта тағы 26 мың түп ағаш көшетін отырғызу жоспарланып отыр.
Созақ ауданы орталығындағы «Абай» және «Тәуелсіздік» саябақтарына 2 мыңға жуық көшет егілсе, Шолаққорған – Түркістан бағытындағы «Жасыл белдеу» аумағына жаңадан егілген тал көшеттерінің саны 4 мыңға жуықтады. Мұнда жаңадан егілген тал көшеттерін шарбақпен қоршау, тамшылатып суару қондырғысын орнату іс-шаралары жүргізілді. Аумағы 10 шақырым болатын «Жасыл белдеу» аймағында бүгінге дейін егілген көшеттердің саны 10 мыңнан асты. Экологиялық акция аясында Ордабасы ауданында ауқымды сенбілік өтіп, жол бойындағы ағаштар ақталып, арық-атыздар, аяқжолдар тазартылды. Сондай-ақ халық қалаулысы Нұзат Ортай өз есебінен 300 метр тор алып беріп, нәтижесінде тұрғындар асарлатып көшет егілген аумақты қоршап алды. Төлеби ауданының тұрғындары да тазалық іс-шарасында белсенділік танытты. Табиғат жанашырлары 29 600 түп көшет отырғызды.
Абаттандыру, көгалдандыру және тазалық жұмыстарының сапалы жүргізілуі де қатаң бақылауға алынған. Облыс әкімі аппаратының апталық мәжілісінде өңір басшысы Дархан Сатыбалды бұл бағыттағы жұмыстардың әлі де өз деңгейінде жүйеленбегенін айтып, жауаптыларға тапсырмалар жүктеді.
«Мемлекет басшысының тапсырмасы аясында 2021–2025 жылдар аралығында өңіріміздегі 800-ден аса елді мекенді көгалдандыру үшін 4 миллионнан аса көшет отырғызу көзделген. Биылдың өзінде миллионнан аса көшет егіледі. Әкімі қандай болса, ауылы сондай. Бірнеше рет бұл мәселе бойынша тапсырма берілді. Бірнеше аудан, қалада ғана сәл нәтиже, қозғалыс бар. Қалғандары әлі де немқұрайды. Біз тазалық пен абаттандыруды жыл бойы талап ете береміз. Егер оны орындай алмайтындар болса, шара қолданамыз», деді Д.Сатыбалды.
Өңірде 2024–2026 жылы қалаларды көгалдандыру және абаттандыру жол картасы бекітілген. Наурыз айынан бастап ұйымдастырылған сенбіліктерде аудан, қала әкімдіктері тарапынан 201 мыңнан аса ағаш көшеті отырғызылып, 317 030 ағаш әктелді. Сенбіліктерде 2 710 тонна қоқыс шығарылып, 1 152 көшенің бойы, 265 шақырым аяқжолдар тазаланды. 275 саябақ пен гүлбақ, 192 балалар және спорт алаңшасы ретке келтірілді. 95 шақырым көпір, өзен, канал мен бұлақтың арналары тазаланды, 897 көпқабатты тұрғын үй маңындағы аумақтар мен аулалар, жертөлелер, кіреберістері жиналды. Елді мекендерде абаттандыру нысандарын және санитария жағдайын қалыпты деңгейде ұстау мақсатында мобильді топтар құрылып, аралау кестесі бекітіліп, қажетті құрал-сайманмен қамтылған.
Сондай-ақ қалалар мен елді мекендердің аумақтарын абаттандыру қағидалары мен инфрақұрылым нысандарын бұзу, жасыл екпелерді жою және бүлдірудің алдын алу мақсатында «Әкімшілік құқықбұзушылық туралы» кодекстің баптарына сәйкес шаралар қолданылған. Атап айтқанда, биыл облыс аумағында жоғарыда аталған мәселелерге байланысты заң бұзып, тазалыққа, инфрақұрылымға нұқсан келтірген жүздеген тұрғынға жалпы көлемі 81,1 млн теңге айыппұл салынған.
Түркістан облысы
