Исатай мен Махамбет бабамыздың мəңгілік жай тапқан мекеніне барған сапарымыз − өткенімізді ұмытпай, болашақтың бесігінде батырларымыздың рухын тербетудің басты көрінісі деп есептеймін.
Индер ауданының Қараой жазығында Махамбет батыр мен Малайсары би жатқаны баршаға белгілі. Экспедиция мүшелерін Индер ауданының əкімі Серік Арыстан қарсы алып, тарихи-мəдени мұраларымыздың республика көлеміндегі алатын орны, маңыздылығына кеңірек тоқталды.Тарихтың қойнауынан сыр шертетін Жəңгір хан, Исатай мен Махамбеттің арасында өрбіген оқиғаларды қойылым арқылы аудан өнерпаздары көрсетті.
Батыс Қазақстан облысы, Ақжайық ауданының мұражайы тарихи мəні бар экспонаттармен қамтылған, мəдени мұрамызды айшықтайтын ордалы отау екенін ұғындық. Сырым ауданында Алаш қайраткерлерінің мүсіндері менмұндалап тұр. Елім деп еңіреп өткен ерлеріміздің есімі Алаш саябағының төрінде алтын зерлі жазумен жарқ етіп тұрғаны көңілге қуаныш сыйлайды. Халық жазушысы, көрнекті ақын Қадыр Мырза Əлінің ескерткішін қойып, əдебиеттің алтын дəуірін жасаған қаламгерді əспеттеген жұртшылыққа алғыс білдіру қажет.
Ақтөбе облысы, Қобда ауданының тыныс-тіршілігімен таныса келе, мəдени мұрамыздың мəйегі екенін айтқым келеді. Исатай бабамыздың кесенесі Шейітсай мекенінде орналасқан. Атақты Михаил Герасимовтің шəкірті, антрополог-ғалым Ноэль Жұмабайұлы Шаяхметов зерттеу жұмыстарын жүргізгенде, сүйекті ашуға атсалысқан қария Жауғашты Жұмағалиевпен, «Исатай» қоғамдық қорының президенті, исатайтанушы Еркін Құрманбековпен жүздестік. Қобда ауданының əкімдігі Исатай бабамыздың кесенесіне жол салу жөнінде сметалық құжаттары дайындалып жатқанын жеткізді. Ауданда 320 орындық білім беру нысанына Исатай бабамыздың есімі беріліп, биіктігі 11 метрді құрайтын бабамыздың ескерткіші қазан айында ашылатындығы жөніндегі жағымды жаңалықтан хабардар болдық.
Экспедицияның басты мақсаты – Исатай мен Махамбет бабаларымыздың рухын жаңғырту, баһадүр батырларымыз бастаған көтеріліс жөнінде тың деректерді жинақтау еді. Мақсат орындалды.
Әділбек ӨМІРЗАҚОВ, «Қарой – Шейітсай – Қарой» экспедициясының мүшесі