Оқушылардың жазғы каникулы басталысымен балалардың қауіпсіздігі мәселесі алдан шығады. Ата-аналардың қарауынсыз түнгі уақытта серуендеп, суға шомылуға рұқсат етілмеген жерлерді жағалап кететін жеткіншектер бар. Мұның арты қайғылы жағдайға апаратын оқиғалар аз емес.
Жағымсыз жағдайдың алдын алу үшін Ішкі істер министрлігі жедел-алдын алу шараларын жиі ұйымдастырады. Атап айтсақ, «Түнгі қаладағы балалар», «Су қоймаларындағы балалардың қауіпсіздігі» сияқты акциялар өткізілуде. Полицейлер қалалар мен аудан көшелерінде, ойын-сауық мекемелерінде, компьютерлік клубтарда күшейтілген рейдтер жүргізіп жатыр. Балалардың су айдындарында қараусыз қалмауына да ерекше назар аударылуда. Тәртіп сақшылары ата-аналарға кәмелетке толмағандардың түнгі уақытта заңды өкілдерімен еріп жүру керектігі туралы ескертуде.
Естеріңізге салсақ, кәмелетке толмаған баланы тәрбиелеу немесе білім беру, оның құқықтары мен мүдделерін қорғау жөніндегі міндеттерін орындамағаны үшін Әкімшілік құқық бұзушылық туралы кодекстің 127-бабы бойынша ата-ана жауапкершілікке тартылады. Сондай-ақ кәмелетке толмағандардың заңды өкілдерінің еріп жүруінсіз түнгі уақытта ойын-сауық мекемелерінде болу фактілері тіркелсе, Әкімшілік құқық бұзушылық туралы кодекстің 442-бабы 1-бөлігі бойынша ата-аналар жазаланып, Кодекстің 132-бабы бойынша кәсіпкерлік субъектілері жауапқа тартылады.
Белгілі болғандай, ойын-сауық мекемесіне келушінің жасын сол мекеменің қызметкері анықтауы керек. Келушінің жасына қатысты қандай да бір күмән туындаған жағдайда қызметкер келушінің жасын жеке куәлігін көрсету арқылы дәлелдеуді талап етуге құқылы.
«Су қоймаларындағы балалардың қауіпсіздігі» акциясы шеңберінде полицейлер көпшілік демалатын орындарды, су қоймаларын және жағажайларды аралап, арнайы ескерту парақшаларын таратып, судағы қауіпсіздік ережелерін түсіндіреді. Мұнымен мәселе шешіле қоймас. Кез келген ата-ана баланың жазғы кезеңдегі қауіпсіздігі туралы ұмытпауы керек. Сондай-ақ ата-аналар кәмелетке толмаған адам түнде көшеде жүргенде қылмыстың объектісі немесе субъектісі бола алатынын ұғынуға тиіс. Яғни оны тонап, ұрып-соғуы немесе өзі де қандай да бір құқық бұзушылық жасауы мүмкін.
Заңды өкілдерінің еріп жүруінсіз балалар мен жасөспірімдер ойын-сауық мекемелерінде тек сағат 22.00-ге дейін, ал көшеде сағат 23.00-ге дейін болуға рұқсат етіледі. Рейдтер бау-бақша, фермерлік алқаптар, шаруа қожалықтары, үйлердің жертөлелері, темір жол және автобус вокзалдарында да жүргізіліп жатқанын атап өткен жөн. Көп жағдайда еңбек шарттары жасалмай, балалар еңбегін заңсыз пайдалану фактілері тіркелетін көрінеді.