Бүгін Ташкентте Шанхай ынтымақтастық ұйымына мүше Мемлекеттер басшылары кеңесінің мәжілісі болады. Оның қорытындысында ШЫҰ-ға төрағалық Қазақстанға өтеді.
Ақтауда жұмыс сапарымен болған Қазақстан Республикасының Президенті Нұрсұлтан Назарбаев кеше Шанхай ынтымақтастық ұйымына (ШЫҰ) мүше Мемлекеттер басшылары кеңесінің мәжілісіне қатысу үшін Өзбекстан астанасы – Ташкент қаласына келді.
Шанхай ынтымақтастық ұйымы – 2001 жылдың 15 маусымында Шанхайда Қазақстан, Қытай, Қырғызстан, Ресей, Тәжікстан және Өзбекстан мемлекеттерінің арасында құрылған халықаралық ұйым. Ұйымның негізгі мақсаты оған қатысушы елдер арасындағы өзара сенім мен тату көршілік қатынастарды нығайту, саяси, сауда-экономикалық, ғылыми-техникалық және мәдени шаралар бойынша тиімді ынтымақтастыққа ықпал ету, сондай-ақ өңірде қауіпсіздік пен тұрақтылықты бірлесіп қамтамасыз ету болып табылады.
Ұйымның тұрақты қызмет ететін екі органы: Пекинде орналасқан Хатшылығы және Өңірлік антитеррорлық құрылымның атқарушы комитеті бар. Қазіргі кезде ұйымға Өзбекстан төрағалық етеді.
Қазақстан Президенті Нұрсұлтан Назарбаев кеше кешкісін халықаралық форумдар сарайында ШЫҰ-ға мүше мемлекеттер және байқаушы мемлекеттер басшыларымен, халықаралық ұйымдар жетекшілерімен бірге Өзбекстан өнер шеберлерінің мерекелік концертін тамашалады.
Қазақстан басшысы Нұрсұлтан Назарбаев кеше сондай-ақ Шанхай ынтымақтастық ұйымы аясында алдымен Өзбекстан Республикасының Президенті Ислам Каримовпен, одан кейін Ресей Федерациясының Президенті Дмитрий Медведевпен екіжақты кездесу өткізіп, жиынға қатысты мәселелер жөнінде пікір алмасты.
Шанхай ынтымақтастық ұйымына мүше мемлекеттер басшылары кеңесінің отырысы бүгін болады. Алдымен ұйымға қатысушы мемлекеттер басшыларының шағын құрамдағы отырысы өтеді, одан соң Кеңес отырысы кеңейтілген құрамда жалғасады. Кеңес отырысынан соң қорытынды құжаттарға қол қойылады деп күтілуде. Сондай-ақ Кеңестің осы мәжілісінде Шанхай ынтымақтастық ұйымына төрағалық ету Қазақстанға өтеді.
Әлисұлтан ҚҰЛАНБАЙ – Ташкенттен.