Бет қаратпайтын үскірік аязы көп, қысы қытымыр өлкеде жылу беру маусымына мұқият дайындалу өте маңызды. Кейінгі жылдары шағын қалалардың шырайы келмей тұрғаны белгілі.
Биылғы қыс бірден қылышын сүйрете, адамдардың апшысын қуыра келді. Алғашқы күні-ақ өңірде 35-40 градус аяз апталап тұрып алды. Жан баласын аяуды білмейтін алапат суық жаз бойы жан жадыратар жылы сөзбен қымталған кемшіліктің бетін ашып, аймаңдай көрсетіп берді десек те болар. Бұл тарапта билікке өкпелеудің жөні жоқ. Мемлекет басшысы Қасым-Жомарт Тоқаевтың тапсырмасы бойынша Көкшетау және Степногор қалаларының жылумен жабдықтау нысандарын жаңғырту туралы шешім қабылданған еді. Степногор жылу электр орталығында 4 қазандық, 5 турбинаға ағымдағы жөндеу және 2 қазандыққа күрделі жөндеу жүргізілді. №2 және №5 турбиналардың қазандық агрегатын ағымдағы жөндеу, №7 қазандық агрегатын күрделі жөндеу жұмыстары қолға алынды. Бұған қоса жалпы ұзындығы 3,1 шақырым магистралдық желілер жөнделді. «Степногорск Теплотранзит» серіктестігінің өз қаражаты есебінен 4 850 метрді құрайтын желілер күрделі жөндеуден өткізілді. 540 метр желіні ағымдағы жөндеу, 45 метр желідегі жылуды қалпына келтіру және 1 сорғыны ауыстыру жұмыстары іске асырылды. Үкімет резервінен бөлінген 2 млрд теңгенің есебінен 3,1 шақырым магистралдық желілерге жөндеу жүргізілді. Жасалған үнем қосымша 800 метр желілерді жөндеуге мүмкіндік берді.
Бұған қоса «Степногорская ТЭЦ» және «Степногорск Теплотранзит» серіктестіктерінің жеке қаржысы есебінен жылу-электр орталығының және жылумен жабдықтау желілерінің құрал-жабдықтарына 5,3 млрд теңгеге жоспарлы жөндеу жүргізілді.
Былтыр желтоқсанның 7-сінде Степногор қаласының жылу желісінде ірі апат орын алып, қаланың бірнеше шағын ауданы жылусыз қалды. «Степногорск Теплотранзит» серіктестігінің жылу торабының жарылуы салдарынан 3, 6, 7, 8 шағын аудандары жылу желісінен толықтай ажыратылды. Осы апаттың салдарынан 9 мыңнан аса адам 30-35 градус аязда жылусыз әрі жарықсыз қалды. Өңір басшысы Марат Ахметжановтың тікелей тапсырмасымен жылу желісін қалпына келтіру жұмыстарын атқаруға тиісті жедел штаб құрылды. Штаб құрамына әкімдік, төтенше жағдай, денсаулық сақтау саласының қызметкерлері мен елдің жайын ойлаған еріктілер кірді. Аз ғана уақыттың ішінде апат орын алған жылу жүйесі жөнделіп, көпқабатты үйлерге жылу беріле бастады. Үш энергетикалық, бір ыстық су қазандығы қалпына келтірілді. Коммуналдық қызмет тәулік бойы жұмыс істеді. Жауапты мекеме қызметкерлері үй ішіндегі жылу жүйесіндегі кемшілікті анықтау үшін мұқият жұмыс жүргізді. Пәтердегі жылу жүйесінде ақау болатын болса, пәтер иелері кооперативтеріне жедел хабар беру тапсырылды.
Қараша айында Степногор қаласының әкімі Алпысбай Қайыржанов қаланың жылу жүйесіне 5 млрд теңгеге жуық қаржы жұмсалып, жылу жүйелері мұқият жөндеуден өткізілгені туралы хабарлаған еді. Бір айта кетерлігі, шағын қаланың жылу желісі мүлде тозып тұрған. Мамандардың есептеуіне қарағанда, шамамен 80 пайызы әбден ескірген. Үкімет резервінен бөлінген қаржыға 7,8 мың шақырымдық ішкі жылу магистралі мен осы көлемдегі жылу жүйесі кәсіпорынның өз есебінен жөнделгені туралы да айтылған. Әйтсе де, миллиардтаған қаржы жұмсалған жылу желісі арада ай өтпей апатқа ұшырауы түсініксіз. Степногор қаласының іргесіндегі Заводской кентінің бірнеше шағын ауданында жылу жүйесі жарылып, халықтың тұрмыстық техникасы мен қыруар дүние-мүлкі бүлінді. Тұрғын үйлердің қабырғаларына су сіңіп, ылғал пайда болды. Кейбір үй ішінде қатып қалған құбырларды тұрғындар амалсыз өз қаржыларына жөндеді. Дәл осы кезде халық «төтенше жағдай» жариялау керек, «Екібастұздағы жағдай қайталанды», деп өкпе-назын айта бастады.
Қазіргі күні шағын қаланың жылу жүйесі қалпына келтірілген. Әйтсе де, қыруар қаржы бөлінген жұмыстың неге тыңғылықты атқарылмағаны сұрақ туғызады.
Ақмола облысы,
Степногор қаласы