Көкшетау қаласында елімізде кең қанат жайған «Белсенді ұзақ өмір» ұлттық бағдарламасы аясында егде адамдарға арналған орталығы ашылып, шарапатты шаруа жүзеге асырылды.
Ашылу салтанатында облыс әкімі Марат Ахметжанов жаңа инновациялық жобаның маңызына тоқталып, жасалып жатқан игі істер жайында баяндап берді. Орталық директоры Бақыт Смағұл жаңа мекеме аға буынға жайлы орын болатындығына сенім білдірді. Айтса айтқандай, ғимарат толық жаңартылған. Құтты құрылысшының қалағынан жаңа шыққандай жарқырап тұр. Ең бастысы, заманауи жабдықтармен қамтамасыз етіліпті. Негізгі қызметі – емдік, дене шынықтыру, йога, скандинавиялық жүріс, вокал, хореография, қолөнер шеберлігін дамыту, шахмат, тоғызқұмалақ, асық ату тәрізді ойындарға қызығушылықты арттыру. Компьютерлік білім алуға толық мүмкіндік жасалған.
– Мен облыс орталығындағы автокөліктерді жөндеу стансасында жарты ғасырға жуық еңбек еттім, ұзақ уақыттан бері шахматпен айналысамын, – дейді қала тұрғыны Сәкен Тәңірқұлов. – Орталық зейнеткерлердің бас қосып, шүйіркелесетін, түрлі ойындар ойнап, өздері қызығатын шаруамен шұғылданатын орынға айналғалы тұр. Ең бастысы, мемлекет тарапынан аға буынға айта қаларлықтай қамқорлық жасалып отыр.
Ашылу салтанатында Франциядағы халықаралық күміс университеттер қауымдастығының президенті, профессор Франсуа Веллас онлайн байланысқа шықты. Профессор орталықтың ашылуымен құттықтап, жарқын жоба жөніндегі лебізін білдірді.
Орталықта арнайы медициналық кабинет бар. Онда дәрігер келушілердің денсаулықтарын қадағалайды. Аппараттық база әзірленіп, ем-домның қажеттіліктері екшеленеді. Жаңа ғимаратта ардагерлер кеңесі де орналаспақ.
Жаңа жобаны жүзеге асыруға меценаттар да қатысыпты. Бұл да болса, жақсы нышан, жарқын мысал. Өңірдегі мемлекеттік және жекеменшік университеттер ынтымақтастық меморандумына қол қойды.
КӨКШЕТАУ