Бүгін «Егемен Қазақстан» газетінде Премьер-министр Олжас Бектеновтің «Жасампаздыққа жетелеген жеті жыл» атты көлемді мақаласы жарық көрді. Мақалада Қасым-Жомарт Тоқаевтың тұтас ұлт тағдырын мойнына алған жеті жылда еліміздің әлеуметтік-экономикалық және саяси даму моделінде ауқымды әрі жүйелі өзгерістер болғаны қамтылған. Үкімет басшысы өскелең ұрпақтың жағдайына да ерекше көңіл бөлініп жатқанын атап өтті, деп жазады Egemen.kz.
«Ұлттық қор – балаларға» бағдарламасы – Президенттің маңызды бастамаларының бірі», деді Үкімет басшысы.
Еске сала кетейік, аталған бағдарлама шеңберінде балалардың шотына Ұлттық қордың инвестициялық кірісінен жыл сайын қаражат аударылады, оны әр бала 18 жасқа толғаннан кейін білім алуға немесе тұрғын үй жағдайларын жақсарту мақсатында пайдалана алады.
«Бағдарлама жүзеге асырылған үш жыл ішінде еліміздегі жеті млн баланың шотына 2,5 млрд доллардан астам қаражат аударылды», деді Премьер-министр.
Ұлттық қор балаларға 888 млн доллар аударды
Сонымен қатар Олжас Бектенов Мемлекет басшысының тапсырмасы бойынша 2026-2030 жылдарға арналған «Қазақстан балалары» бірыңғай бағдарламасы бекітілгенін, ол Қазақстандағы балалардың құқықтары мен әл-ауқатын қамтамасыз ету бойынша барлық қолданыстағы және жоспарланған іс-шаралардың басын біріктіретініне тоқталды.
«Аталған құжат елдегі әрбір баланың құқықтары мен әл-ауқатын жүйелі түрде қорғауды қамтамасыз ететін орнықты мемлекеттік саясаттың негізі болып табылады», деді Олжас Бектенов.
Жасампаздыққа жетелеген жеті жыл