Мемлекеттік бюджеттің әр тиынының сұрауы болар уақыт келді. Кеңқолтықтау заманда мемлекеттен бөлінген қыруар қаражатқа түрлі әлеуметтік нысандар салған мердігерлер сапасына жеткілікті мән бермей, бауы мен шуына оралып жүретін.
Күні кеше пайдалануға берілген ғимараттың шатыры жел бір ұйытқып соққанда тұтасымен қарғадай қалбалақтап жерге ұшып түскен. Мектеп салған мердігер тапсырыс берген парта кішкентай болып, ересек оқушылар кептеліп отыратын оқиғалар да кездескен.
Енді ондай келеңсіздікке жол жоқ. «Нұр Отан» партиясы Қазақстан Республикасының Ұлттық қоры мен бюджеттен бөлінген қаражаттың мақсатты әрі тиімді жұмсалуына мониторинг жасап, бақылау ісін қолға алды.
Былтыр «Нұрлы Жол» бағдарламасы аясында Оңтүстік Қазақстан облысында 24 нысанның құрылысына 7 439,9 млн.теңге қаржы бөлінген. 2015 жылғы 31 желтоқсандағы мәлімет бойынша, өңірдегі 11 нысанда құрылыс жұмыстары аяқталып, 7 409,6 млн.теңге немесе қаралған қаражаттың 99,6 пайызы игеріліпті. Ал қалған нысандардың құрылыс жұмыстары 2016 жылға өткен.
Түркістан қаласында 280 орынға есептелген балабақша құрылысына 395,8 млн. теңге қаралып, нысанды биылғы маусым айында ел игілігіне тапсыру жоспарланған. Кеше Түркістан қаласындағы партия филиалы жанындағы инфрақұрылымдарды дамыту комиссиясының төрағасы Баймахан Сүлейменов бұқаралық ақпарат құралдары өкілдерінің қатысуымен аталған нысанның құрылыс барысы және жұмысымен танысу үшін арнайы рейд ұйымдастырды.
Өткен жылы балабақшаға бюджеттен 250 млн. теңге бөлініп, мердігер «Бек» серіктестігі бекітілген кесте бойынша жұмысты тиянақты орындапты. «Бек» ЖШС-нің учаске басшысы Мұрат Орынбетов: «Балабақша құрылысын өткен жылдың маусым айында бастадық. Қаржыландыру уақтылы болғандықтан, біз өткен жылға жоспарланған жұмысты бекітілген мерзімде бітірдік. «Нұр Отан» партиясының комиссия мүшелері біз атқарған жұмыстың сапасын бақылауда. Нысандағы жұмыстарды осы жылдың мамыр-маусым айларында толыққанды аяқтаймыз деген ойдамыз», – деді.
Осындайда еске түседі. 2000 жылдардың басында Түркістанның «Достық» ауылына қоныстанған ағайындардың арызымен сапасыз салынған мектеп ғимаратын көруге келгенбіз. Едені кеппеген тақтаймен жабылған. Астынан ыза өткен соң, су тақтай бордай үгіледі. Салмағы ауырлау бір мұғалімі орындыққа сылқ отырғанда төрт темір аяғы еденді тесіп кетіп, үйелеп қалған ғой. Шіріген тақтайдан еденді ұстап тұру үшін әр жерден кірпіш тіреу қойылғанын өзіміз де көрдік. Бүгінде ондай сапасыз құрылыстар келмеске кетті.
Айтқандай, 280 орындық балабақшаны салуға жұмсалған құрылыс материалдарының 90 пайызы отандық болса, соның 40 пайызы Түркістан кәсіпкерлерінің үлесіне тиді. Түркістанда еліміз Тәуелсіздік алғалы 22 жаңа мектеп, 10-нан астам медицина нысандары салынған. Бұған қосымша айтарымыз, Түркістан қаласы ежелгі өркениет орталығы ретінде ЮНЕСКО-ның бүкіләлемге танымал мәдени-тарихи кешендер мен ескерткіштер тізіміне кірсе, Ахмет Ясауи кесенесі Жібек жолын жаңғырту бағдарламасына енген.
Мағжан ақын «Түркістан – ер Түріктің бесігі ғой», деп жырлаған киелі қалада осындай іргелі бастамалар қолға алынып жатыр.
Бақтияр ТАЙЖАН,
«Егемен Қазақстан».
Оңтүстік Қазақстан облысы.