5 қазанда (Нұр-Сұлтан уақыты бойынша 6 қазан) АҚШ-тың Нью-Йорк қаласындағы Madison Square Garden аренасында өтетін кездесуде боксшылар IBF белдігінің әлем чемпионы атағын сарапқа салады.
Бокс жанкүйерлерінің есінде болса, былтыр Халықаралық бокс федерациясы (IBF) қазақстандық боксшыға украиналық Сергей Деревянченконы міндетті қарсылас екенін атап, екі боксшының кездесуін міндеттеген болатын. Алайда Геннадийдің командасы IBF ұйымынан белбеуді (сол уақытта отандасымыз IBF белбеуінің иегері еді) қорғау мерзімін кейінге шегеруге рұқсат сұрап, аталған ұйымға 20 мың доллар өтемақы төлеген-ді.
Жекпе-жек уақыты белгіленіп, келісімшартқа қол қойылғаннан кейін Головкин де, Деревянченко да әдеттегідей кездесу туралы өздерінің алғашқы пікірлерін білдірді.
Головкин: «Бәрі білетіндей, өзімнің екінші үйім саналып кеткен Madison Square Garden аренасына оралатыныма қуаныштымын. 5 қазан күні ол жерде керемет бокс кеші өтеді деген сенімдемін. Мен әрдайым жанкүйерлеріме өздері қалағандай шоу көрсетіп келемін. Олар да сондай жекпе-жек көруге лайықты жандар. Бұл жолы да жанкүйерлеріме қызықты бокс кешін ұсынамын. Тез арада DAZN арқылы биг-драма-шоуда кездесеміз. Өткізіп алмаңыздар».
Деревянченко: «Геннадий Головкинді сыйлаймын және оған құрметпен қараймын. Сондай-ақ осындай атақты қарсыласпен жұдырықтасу мүмкіндігі екінің біріне беріле бермейді, сондықтан алдағы айқаста боксқа келгендегі мақсатым – әлем чемпионы атану үшін қолымнан келгенін істеймін. «Мэдисон» мен DAZN көрермендері екі үздік боксшының арасындағы тамаша кездесуге куә болмақ. Сондықтан тезірек рингке көтерілуге асықпын» деді.
Алдын ала мәлімет бойынша, бұл жекпе-жек үшін отандасымыз Геннадий Головкин DAZN стримингтік сервисімен келісім бойынша 100 миллион доллардың бір бөлігін иеленеді. Орта есепен ол 15 миллион АҚШ доллары көлемінде гонорар алуы мүмкін. Сондай-ақ жарнама мен трансляциядан түскен қаржыға да иелік етеді.
Ал Деревянченко Головкинмен айқасы үшін тек өзінің ғана емес, бүкіл украиналық боксшылар арасында рекордтық гонорар алмақ. Яғни, ол бұл жекпе-жектен 5 миллион АҚШ долларынан аса табыс таппақ. Деревянченко бұған дейін 500 мың доллар көлемінде гонорар алған болатын.
С.Деревянченконың WSB жобасында еліміздің «Астана арландары» бокс клубында жұдырықтасқаны белгілі.
